ट्राफिक राजश्व संकलनमा कमी

भरतपुर । चुनावी सरगर्मी चलेसँगै जिल्लाको ट्राफिक राजस्व संकलनमा समेत कमी आएको छ । गत मंसिर ४ गते सम्पन्न संविधानसभा सदस्यको निर्वाचनका लागि जनशक्तिहरु निर्वाचनमा खटिएका र दलीय कार्यक्रममा अधिक सवारी साधनहरु प्रयोग भएका कारण जिल्ला ट्राफिक कार्यालय चितवनले संकलन गर्ने राजस्वमा कमी आएको हो ।
गत असोज महिनाको तुलनामा कात्तिक महिनामा करिब ३९ प्रतिशतले राजस्व संकलनमा कमी आएको कार्यालयले जनाएको छ । गत कात्तिक महिनामा जिल्ला ट्राफिक कार्यालयले चार लाख ३३ हजार १०० रूपैयाँ राजस्व संकलन गरेको छ । सोही अवधिमा गत असोज महिनामा सात लाख आठ हजार १०० रूपैयाँ राजस्व संकलन भएको थियो । जुन अघिल्लो महिना भन्दा ३८.८४ प्रतिशतले कम हो ।
त्यस्तै, कार्यालयले गत भाद्र महिनामा संकलन गरेको राजस्वभन्दा असोजमा संकलित राजस्व पनि कम छ । असोज महिनामा भाद्र महिनामा संकलित राजस्व भन्दा २७.७४ प्रतिशतले कमी आएको कार्यालयले जनाएको छ । गत भाद्र महिनामा कार्यालयले नौ लाख ७९ हजार ८०० रूपैयाँ राजस्व संकलन गरेको थियो ।
यता सवारी साधन तथा चालकलाई कारबाहीको संख्यामा पनि कमी आएको छ । गत भाद्र महिनामा कारबाही संख्या तीन हजार २२१ रहेकोमा असोज महिनामा दुई हजार ३३९ वटा सवारी तथा चालकहरुलाई कारबाही गरेको कार्यालयको तथ्याङ्कमा उल्लेख छ । त्यस्तै कार्यालय कात्तिक महिनामा एक हजार ५५९ वटा सवारी तथा चालकलाई कारबाही गरेको छ ।
राजश्व संकलन सबैभन्दा बढी क्षमताभन्दा बढी भारी बोक्ने तथा सिट क्षमताभन्दा बढी यात्रु बोक्ने सवारीलाई कारबाहीबाट हुने गरेको कार्यालयले जनाएको छ ।
समग्रमा कार्यालयको राजस्व संकलनमा समेत निर्वाचनले केही असर गरेको कार्यालयले जनाएको छ । निर्वाचनका बेला अधिकांश सवारी साधन राजनीतिक दलका कार्यकर्ताहरुले प्रयोग गरेको तथा सवारी चेकजाँचमा कमी आएकाले पनि राजस्व संकलन मा कमी आएको हो । जिल्लामा जनशक्ति कम हुँदा समेत राजस्व संकलनमा केही प्रभाव परेको छ ।
यता ट्राफिक कार्यालयले चालु आर्थिक वर्षको पहिलो चौमासिकसम्म २८ लाख ६८ हजार १०० रूपैयाँ राजस्व संकलन गरेको छ । यसैबीच कार्यालयले चालु महिनाको १४ गतेसम्म एक लाख ८२ हजार ७५० रूपैयाँ राजस्व संकलन गरेको छ । उक्त अवधिमा कार्यालयले ७४५ सवारी तथा चालकलाई कारबाही गरेको छ ।