निर्वाचनपछिको कांग्रेस

संविधानसभाको निर्वाचन परिणामपश्चात् मुलुकको राजनीति अचानक तात्न पुगेको छ । समयमै संविधान बन्ने कुरामा जनता एक प्रकारले ढुक्कजस्तै देखिएका छन् । जनप्रतिनिधिहरु पनि मतदातासमक्ष आगामी एक वर्षभित्र संविधान लेखिने प्रतिबद्धता व्यक्त गरिरहेका छन् । यसैक्रममा सबैभन्दा ठूलो दल बन्ने सौभाग्य पाएको नेपाली कांग्रेस आगामी सरकार आफ्नै पार्टीको नेतृत्वमा बन्ने कुरामा ढुक्क छ र उसले आफ्नो तयारी पनि भित्रभित्रै गर्न थालेको छ । जनादेशले सरकारको नेतृत्व गर्ने अवसर कांग्रेसलाई नै दिएको कारण यो विषय निर्विवाद बनिसकेको छ । नेकपा एमालेलगायतका दलहरुको सहकार्यमा कांग्रेसले सरकार बनाउने भएपछि मुलुकको राजनीतिक संक्रमणकालको पनि अन्त्य हुन लागेको अनुभव अहिले भइरहेको छ ।
यसपटक जनताले कांग्रेसलाई जुन विश्वासका साथ ठूलो पार्टी बनाएका छन्, त्यो विश्वासको मूल्य चुकाउन कांग्रेस सक्रिय बन्नुपर्ने आवश्यकता महसुस गरिएको छ । विगतमा सरकार बनाउने अवसर पाउँदा कांग्रेसले कुनै राम्रो र उल्लेखनीय काम गर्न सकेन । आफ्नै पार्टीभित्रको अन्तर्कलहका कारण सत्ता सञ्चालन गर्न र जनताको सेवा गर्न विगतमा कांग्रेस निश्चय नै असफलताको भुमरीमा फस्न पुगेको कुरालाई जनताले बिर्सिसकेका छैनन् । अब ती घटनाहरुबाट पाठ सिकेर कांग्रेस अघि बढ्नुपर्ने स्थिति देखा परेको छ ।
केवल गगन थापा र नरहरि आचार्यजस्ता निर्विवाद र सुयोग्य पात्रले मात्र कांग्रेसको साख जोगाउन सक्तैनन् । सिंगो नेपाली कांग्रेसमा अहिले शुद्धीकरणको गम्भीर खाँचो छ । पार्टी सभापति सुशील कोइरालाको बेदाग व्यक्तित्व प्रधानमन्त्री बन्ने सुयोग जुटेको बेलामा अन्य केन्द्रीय नेता र कार्यकर्ताहरुले पनि आफूलाई शुद्धीकरणको अग्निपरीक्षामा खरो रुपमा उतार्न सक्नु परेको छ । जनताले दिएको यो अवसरलाई कुनै पनि हालतमा गुम्न नदिन कांग्रेसमा पुनर्जीवनको आवश्यकता देखिन्छ ।
अब बन्ने सरकारलाई सहमतीय आधारमा संरचना गर्न सकिएमा भावी सरकारले आफ्नो पूर्ण कार्यकाल बिताउन सक्ने अनुमान गर्न सकिन्छ । जनताले चाहेको संविधान यथाशक्य छिटो लेख्न कांग्रेसले नेतृत्वदायी भूमिका खेल्न सक्नु परेको छ । एमाओवादी पहिलोबाट तेस्रो स्थानमा खुम्चिनु परेको कटु यथार्थलाई समेत आत्मसात् गरेर कांग्रेसले गणतन्त्रको रक्षा गर्न र जनमुखी काम गर्न सकेमा मात्र जनमतको सम्मान भएको ठानिने छ । राजनीतिलाई मूल्य र मान्यतामा आधारित बनाउँदै दुई ठूला छिमेकी राष्ट्रसँग सन्तुलित सम्बन्ध राखेर नेपाललाई आर्थिक रुपले समृद्ध बनाउनु आजको प्रमुख आवश्यकता हो । यही लक्ष्य हासिल गर्न सकिएमा नेपाली कांग्रेस भविष्यमा पनि ठूलो पार्टी बनेर रहने कुरालाई समयले रोक्न सक्नेछैन ।