भरतपुर नगरपालिकाको योजना कार्यान्वयनमा ढिलाइ

बसन्त पराजुली
भरतपुर । संविधानसभाको निर्वाचनका कारण भरतपुर नगरपालिकाले सञ्चालन गरेका चालु आर्थिक वर्षका योजना कार्यान्वयनमा ढिलाइ भएको छ । मसिर ४ गतेको निर्वाचन अघि योजना कार्यन्वन गर्न नसकिएको भन्दै कार्यन्वयनमा ढिलाइ गरिएपछि समस्या परेको हो ।
‘योजना अव सुरु हुन्छ’, भरतपुर नगरपालिका योजना शाखाका प्रमुख ईन्जिनियर भरत आचार्यले भन्नुभयो, ‘निर्वाचन आचारसंहिताका कारण पनि योजना कार्यान्वयन रोकेका हौ ।’निर्वाचन सकिएकाले पनि अव विकास निर्माणका काम सुरु गरिने पनि उहाँले जनाउनुभयो । ‘नगरपालिकाको स्वीकृत कार्यक्रम अव प्रक्रियाअनुसार सुरु हुन्छ’, उहाँको थप भनाइ थियो, ‘नयाँ आर्थिक वर्ष सुरु हुनुसँगै योजना पनि सुरु गर्नुपर्ने हो तर ढिलाइ भयो ।’
चालु आर्थिक वर्षका लागि भरतपुर नगरपालिकाले ३२ वटा योजना स्वीकृत गरेको छ । ४ करोड ६० लाख रुपैयाँ बराबरका ती योजना कार्यान्वयन गरिन लागिएको हो । साउन लागेसँगै नयाँ आर्थिक वर्ष सुरु हुन्छ । आर्थिक वर्ष सुरु भएको पाँच महिनासम्म पनि योजनाका कामहरु सुरु नहुनुले योजना छिटो–छिटो गर्नुपर्ने आवश्यकता देखिएको छ ।
‘छोटो समयमा काम गर्दा कतै यसको क्वालिटीमा समस्या पर्न सक्छ’, एक निर्माण व्यवसायीले भने, ‘हतारको काम भन्ने नहोस् भन्नका लागि पनि सर्तकता अपनाउन जरुरी छ ।’ तर, ढिलाइ नै भए पनि कामको गुणस्तरीयतालाई निक्कै ध्यान दिइने ईन्जिनियर आचार्यले बताउनुभयो ।
‘नगर पालिकाले कार्यदलनै वनाएर योजनाका गुणस्तरको अनुगमन गर्छ’, उहाँको जवाफ थियो । कतिपय योजनाहरु उपभोक्ता समिति मार्फत गरिने भएकाले पनि समस्या नहुने उहाँको तर्क छ ।
नगर पलिकाले स्विकृत गरेका योजनाहरुमा वढी सडक निर्माण तथा कालो पत्रे रहेका छन् सामान्य ढल निर्माण र मर्मतलाइ पनि योजनामा समेटिएका छन् । नगर पालिकाले स्विकृत योजना सगै केही प्राथमिकताका योजनाहरुलाइ नयाँ योजनाका रुपमा पनि अघि वढाउन लागेको छ । भरतपुर अस्पताल अघिको सडक सहित केही सडकहरुलाइ समेटेर राष्ट्रिय वजेट विनियोजित गर्ने गरि नगर पालिकाले नयाँ काम गर्दै छ ।
‘नगरपालिकाको स्वीकृत कार्यक्रमसँगै अन्य प्राथमिकताका केही योजनाहरु पनि हामीले नगरको बोर्ड बैठकबाट स्वीकृत गराएर गर्ने योजनामा छाँै’, आचार्यले भन्नुभयो । यसरी नयाँ तय गर्न लागिएका योजनाहरुका लागि आवश्यक बजेटका बारेमा स्थानीय विकास मन्त्रालयसँग माग गरिसकिएको पनि उहाँले जनाउनुभयो ।