पुस मसान्तसम्म विवरण बुझाउने समय

भरतपुर । आन्तरिक राजस्व कार्यालय भरतपुरले स्थायी लेखा नम्बर लिएर कार्यालयमा विवरण नबुझाउने व्यवसायलाई पुस मसान्तसम्म विवरण बुझाउन समय दिएको छ ।
आव सकिएको तीन महिनाभित्र सम्पूर्ण विवरण बुझाउनु पर्ने प्रावधान भए पनि कार्यालयको तथ्याङ्कअनुसार आयकरतर्फ ३० प्रतिशत र मूल्य अभिवृद्धिकरतर्फ १७ प्रतिशत व्यवसायीले विवरण बुझाएका छैनन् । कार्यालयले व्यवसायीलाई करको दायरामा ल्याउन अन्तःशुल्कमा दर्ता नभई व्यापार व्यवसाय गर्दै आएका व्यवसायीलाई सचेतना कार्यक्रम गरी करको दायरामा ल्याउने काम समेत गरिरहेको आन्तरिक राजस्व कार्यालय भरतपुरका प्रमुख प्रेम उपाध्यायले बताउनुभयो ।
पुस मसान्तसम्म सचेतना कार्यक्रम गरी पुस मसान्तपछि इजाजत नलिइ व्यापार÷व्यवसाय गर्ने र विवरण नबुझाउने व्यवसायीलाई कारबाही प्रक्रिया थालिने उहाँले बताउनुभयो । रासस