मतदाता भन्छन्, ‘अघिल्लो गल्ती नदोहोरियोस्’

दिपेन्द्र अधिकारी
भरतपुर । संविधानसभाको अर्को निर्वाचनमा सहभागी भएका मतदाताहरुले ६ वर्षको अन्तरालमा पुनः भोट हाल्न पाउँदा आफूहरु निकै खुसी भएको प्रतिक्रिया दिएका छन् । बहिष्कारवादी दलहरुको अवरोधका बाबजुद पनि शान्तिपूर्ण रुपमा मतदान गरेका मतदाताहरुले चुनाव राष्ट्रिय समस्याहरुको निकासका लागि अपरिहार्य भएकाले सक्रिय रुपमा सहभागिता जनाएको बताएका हुन् ।
‘जनमत बुझ्नका लागि चुनाव भएको छ, यो निकै खुसीको कुरा हो,’ चण्डिभञ्ज्याङका दानबहादुर गुरूङले भने, ‘तर पुनः संविधानसभाकै लागि भोट हाल्नुपर्दा भने केही खल्लो महसुस भएको छ ।’
अपवादबाहेक एक जुगमा एक पटक गरिने संविधानसभाको चुनाव ६ वर्षको फरकमा दुई पटक भएपछि आमजनता केही महिना अघिसम्म दलहरुप्रति सकारात्मक थिएनन् । तर, गणतन्त्रलाई संस्थागत गर्न र जनमुखी संविधान बनाउन अघिल्लो पटकका सभासदहरु असफल बनेपछि जनताले पुनः भोट हाल्ने मौका पाएका हुन् ।
पटकपटक संविधानसभाको म्याद थप गरेपनि नेताहरु संविधान जारी गर्न असफल भएका थिए । जुन उद्देश्यका लागि जनताले उनीहरुलाई चुनेर उठाएका थिए सोही उद्देश्य नै पूरा नभई पुनः भोट माग्न आएपछि जनता नेताप्रति केही आक्रोशित पनि बनेका थिए । भत्ताबापत् अर्बौ रूपैयाँ लिएका सभासद्हरु संविधान दिन भने असमर्थ रहेका थिए ।
मतदाताले भनेका छन्, ‘समय थप्ने, भत्ता मात्रै खाने र जनतालाई संविधान दिन नसक्ने सभासद्को काम छैन ।’ मतदाता भन्छन्, ‘अघिल्लो पटक भएका गल्तीहरु नदोहोरिऊन् । समयमै संविधान बनोस् ।
सर्वशान्ति उमावि कुरिनटारमा मतदान केन्द्र रही भोट हाल्न आएका कमेरेका प्रकाश अधिकारीले भने, ‘कुनै पनि दलले स्पष्ट बहुमत पाउँदैनन्, त्यसैले आपसी समझदारीमा विवादित मुद्दाहरुलाई किनारा लगाई जनमुखी संविधान बनाउनु नै उत्तम हुन्छ ।’
दलहरुले आआफ्नो बहुमत आउने दावी गरेपनि जनमत बुझ्दा कुनै पनि दलको बहुमत आउने छाँटकाँट देखिदैन । एक वर्षभित्र जनमुखी संविधान दिने भन्दै दलहरुले चुनावी घोषणापत्रमा उल्लेख गरेपनि विवादित विषयहरु सल्ट्याउने धेरै समय लाग्ने देखिन्छ । तीन चार दलका प्रमुखहरु बसेर कोठे सहमति गर्नुभन्दा पनि सभासदहरुको मतका आधारमा मुद्दाहरुको टुङगो लगाउनु नै राम्रो हुने विश्लेषकहरु बताउँछन् । अति विवादित र गहन राष्ट्रिय मुद्दालाई भने जनमतसंग्रह गरेर भने पनि समाधान गर्नुपर्ने उनीहरुको तर्क छ ।
दलहरुले संविधान जारी हुन नसक्नुमा एकअर्कोलाई दोष थोपारेर पन्छिने प्रयास मात्र गरे । त्यसको बाबजुद पनि दलहरुले राष्ट्रिय मह¤वका विविध विषयमा भने सहमति गरेका थिए । अघिल्लो पटक २०६४ चैत २८ गते संविधानसभाको चुनाव भएको थियो ।
जुन चुनावबाट तत्कालीन नेकपा माओवादी पहिलो शक्ति बनेको थियो । पहिलो हुने निर्वाचित हुने निर्वाचन प्रणालीअन्तर्गत उसले १२० सिट जितेको थियो । कांग्रेस र एमाले भने क्रमशः ३७ र ३३ सिटमा खुम्चिन बाध्य भएका थिए ।