रनपाको दुई करोड आम्दानी

रत्ननगर । रत्ननगर नगरपालिकाले चालु आर्थिक वर्षमा दुई करोड आम्दानी गरेको छ । नगरपालिकाले शुक्रबार गरेको सार्वजनिक सुनुवाईमा आर्थिक वर्ष २०७०÷७१ को साउनदेखि कार्तिक महिनासम्म २ करोड १८ लाख ७ हजार ५ सय ६९ रुपैयाँ आम्दानी भएको  जानकारी गराएको छ ।
कार्यक्रममा वित्तीय विवरण प्रस्तुत गर्दै नगरपालिकाका लेखाअधिकृत सीताराम पोखरेलले कुल आम्दानीमध्ये १ करोड ८५ लाख उपभोक्ता समितिबाट आम्दानी भएको जानकारी दिए । त्यस्तै आन्तरिक श्रोतबाट २९ लाख ५० हजार रुपैयाँ नेपाल सरकारबाट विकास अनुदान ६० लाख ४६ हजार रुपैयाँलगायत अन्य शीर्षकबाट आम्दानी भएको पोखरेलले वताए ।
यसैगरी गत चार महिनामा २ करोड ३ लाख रुपैयाँ खर्च भएको लेखा अधिकृत पोखरेलले जानकारी दिए । गत वर्षको योजनाको भुक्तानीसमेत गरेर १ करोड २८ लाख पूँजीगत खर्च भएको उनले जानकारी दिए । गत वर्षभन्दा यो आर्थिक वर्षमा २ करोड बजेट कटौती भएकाले विकास निर्माणमा चाहिए जति रकम खर्च गर्न नसकिएको लेखाअधिकृत पोखरेलले बताए ।
कार्यक्रममा उपस्थित भएका नगरबासीहरुले आ–आफ्ना क्षेत्रमा भएका समस्या नगरपालिका सामु राख्दै सुझावसमेत दिएका थिए । जवाफमा नगरपालिकाका कार्यकारीअधिकृत पुरुषोत्तम सापकोटाले नगरबासीले उठाएका समस्याको समाधानमा आफू लाग्ने बताउँदै सेवा सुविधा नपाएका नगरवासी, वडा समिति, उपभोक्ता समितिहरुलाई आफूलाई जानकारी गराउन आग्रह गरे ।
नगरपालिकाका कार्यकारीअधिकृत पुरुषोत्तम सापकोटाको अध्यक्षतामा भएको कार्यक्रममा सामाजिक विकास शाखाप्रमुख तोरणराज पौडेलले कार्यक्रमको उद्देश्यका बारेमा जानकारी गराएका सिथए ।