‘कांग्रेसलाई कुनै शक्तिले पराजित गर्दैन’

रत्ननगर । नेपाली काँग्रेसका उपसभापति रामचन्द्र पौडेलले काँग्रेसले मात्रै संविधान दिन सक्ने दावी गरेका छन् । कम्युनिष्ट पार्टीहरुले दुई÷दुई पटक ४ वर्ष सरकारको नेतृत्व गर्दा पनि संविधान दिन नसकेको भन्दै उपसभापति पौडेलले काँग्रेसले मात्र जनताले चाहेको संविधान दिन सक्ने बताए ।
नेपाली काँग्रेस क्षेत्र २ चितवनले रत्ननगरमा आयोजना गरेको चुनावी सभामा उनले जनताले चाहेको संविधान पाउनका लागि काँग्रेसलाई दुई तिहाई बहुमतले जिताउन आग्रह पनि गरे ।
उपसभापति पौडेलले एमाओवादीलाई सभ्यता नभएको पार्टीको संज्ञा दिए । आफ्नो चुनावी सभास्थलमा एमाओवादीले माइकिङ गर्दै हिँडेकोप्रति लक्षित गर्दै उनले भने, ‘एमाओवादी समस्या सिर्जना गर्ने तर समाधानको बाटो नखोज्ने पार्टी हो ।’ उपसभापति पौडेलले पार्टी र जनताका लागि ठूलो त्याग गरेकाले पनि क्षेत्र  २ का उम्मेदवार शेषनाथ अधिकारीलाई जिताउने गरी लाग्न कार्यकर्ताहरुलाई निर्देशन दिए ।
सभामा केन्द्रीय सदस्य सुजाता कोइरालाले कांग्रेसलाई कुनै पनि शक्तिले पराजित गर्न नसक्ने दावी गरे । कांग्रेसप्रतिको जनलहरले गर्दा मंसिर ४ गते हुने संविधानसभाको निर्वाचनबाट कांग्रेस पहिलो पार्टी बन्ने उनको भनाइ थियो । नेतृ कोइरालाले आफ्ना उम्मेदवारलाई हराउन पार्टीभित्रै अन्तरघात गर्नेलाई कारबाही गर्नेसमेत चेतावनी दिइन् ।
चितवनका पाँचै निर्वाचन क्षेत्र जित्नु पर्ने भन्दै उनले त्यो काँग्रेसका लागि सबैभन्दा ठूलो सफलतासमेत हुने बताइन् । चुनावी सभामा प्राध्यापक संघका केन्द्रीय महासचिव प्रकाश अधिकारी, पूर्वसांसद एकनाथ रानाभाट, उम्मेदवार शेषनाथ अधिकारी, समानुपातिक उम्मेदवार सावित्री चौधरी, कांग्रेस जिल्ला सभापति टेकप्रसाद गुरुङ, जिल्ला सचिव जीतनारायण श्रेष्ठ, जिल्ला सदस्य महेन्द्र चेपाङ, जिल्ला प्रवक्ता साजन महतो, कांग्रेस नगर सभापति रुपनराज घिमिरेलगायतले मन्तव्य राखेका थिए । कार्यक्रम क्षेत्रीय सभापति कुमार कार्कीको अध्यक्षतामा भएको थियो ।