एमालेमा जनलहर बढेकाले विरोध

रत्ननगर । नेकपा एमाले चितवन क्षेत्र २ का उम्मेदवार कृष्णप्रसाद खनालले एमालेको जनलहर देखेर कांग्रेस र एमाओवादीका नेता तथा कार्यकर्ताहरु एमालेकोे विरोधमा लागि परेको बताए ।
सौराहाचोकमा आयोजित कार्यक्रममा उम्मेदवार खनालले इतिहासमा मात्रै सीमित हुन लागेको बुढोे कांग्रेस र उग्र एवम् विद्रोही एमाओवादी आगामी चुनावमा पराजित भएपछि बौलाउनुकोे विकल्प नभएको बताए । एमालेको ९ महिने सरकारलाई जनताले अत्याधिक मनपराको बताउँदै उम्मेदवार खनालले हरेक जनमुखी काम र विकासकोे लागि एमालेको बहुमतको विकल्प नदेखिएको उनको भनाइ थियो ।
कार्यक्रममा नेकपा एमालेका पोलिटब्यूरो सदस्य काशिनाथ अधिकारी, जिल्ला कमिटी सदस्य नारायण वन, यादवप्रसाद पाठक, विनाद रेग्मी, नगरअध्यक्ष प्रेमनाथ दुवाडीलगायतले मन्तव्य राखेका थिए ।
एमालेले एक महिना अघिदेखि जारी राखेको टोलटोलमा र घरघरमा मतदाता भेटघाट कार्यक्रमअन्र्तगत रत्ननगरको सौराहाचोक, भक्तिनी बगैचा, बकुलहरलगायतका क्षेत्रमा घरदैलो गरिएको थियो । यसैबीच, नेकपा एमाले चितवन क्षेत्र २ को चुनावी अभियानअन्तर्गत आशिष तामाङको संयोजक¤वमा ४६ सदस्यीय युथफोर्स टास्कफोर्स कमिटी गठन गरिएको छ ।
यस्तै, नेकपा एमाले निर्वाचन क्षेत्र ३ का उम्मेदवारसहितका टोलीले भनपा १ को देवघाट क्षेत्रमा घरदैलो तथा चुनावी प्रचारप्रसार कार्यक्रमलाई तीव्र पारेको छ । उम्मेदवार कृष्णभक्त पोख्रेलसहितको टोलीले देवघाटका विभिन्न क्षेत्रमा जनताको घरघरमा पुगेर मत मागेको प्रचार संयोजक भक्ति गौतमले जानकारी दिए ।
यसैबीच अनेमसंघ भनपा ४ ले महिलाभेलासहित बजार परिक्रमा गरी वडावासीसँग एमाले उम्मेदवार पोख्रेललाई विजयी गराउन मत मागेको छ । अनेमसंघ नगर समिति भरतपुरकी अध्यक्ष उमा कार्कीको प्रमुख आतिथ्यतामा भएको कार्यक्रममा एमालेका उम्मेदवार पोख्रेल महिलाको समस्यासँग सधैँ एकाकार रहेकाले जिताउन महिलाहरुले नगरवासीलाई अनुरोध गरे ।
यसैगरी, एमाले निर्वाचन क्षेत्र ४ की उम्मेदवार पार्वती रावलले देशमा महिला हिंसाको सुरूवात प्रचण्डको घरबाट भएको आरोप लगाए । निर्वाचन प्रचारप्रसार तथा जनता भेटघाट कार्यक्रममा भरतपुर ९ गोन्द्राङ तराई टोलमा भएको कोणसभामा उम्मेदवार रावलले माओवादीले जतिसुकै महिला अधिकारका कुरा गरे पनि एमाओवादी महिलाविरोधी पार्टी भएको दावी गरिन् । उम्मेदवार रावलसहितको टोलीले भरतपुर ९ का विभिन्न क्षेत्रहरुमा घरदैलो कार्यक्रम गरेको थियो ।
यसैगरी, नेकपा एमाले क्षेत्र नः ५ अन्तर्गत मतदाता शिक्षा कार्यक्रम मंगलबार पनि विभिन्न क्षेत्रमा जारी राखेको छ । क्षेत्र ५ को माडीका ४ वटै गाविसमा एमाले गाउँ कमिटीहरुले मतदाता शिक्षा अभियानका रूपमा चलाएका छन् । जगतपुर ७ मा मतदान प्रतिनिधि प्रशिक्षण कार्यक्रम राखिएको प्रचारप्रसार संयोजक रामप्रसाद न्यौपानेले जानकारी दिए ।
त्यस्तै, क्षेत्र १ का उम्मेदवार सुरेन्द्र पाण्डेसहितको टोलीले पनि घरदैलो गरेको छ ।