त्रासमा यातायात व्यवसायी

नेकपा–माओवादीसहितका ३३ दलले आह्वान् गरेको आमहड्ताल अवज्ञा गरी यातायात व्यवसायी तथा मजदुर युनियनले मुलुकभर यातायात सुचारू गर्ने निर्णय गरे पनि व्यवसायीहरुले त्रासका कारण यातायातका साधन निर्बाध रुपमा चलाउन सकेनन् । सरकारले पर्याप्त सुरक्षा र उचित क्षतिपूर्ति दिने प्रत्याभूति गरे पनि व्यवसायीहरु निश्चिन्त हुन सकेनन् । सरकारले पटकपटक लामो दूरी तथा आवश्यक पर्ने स्थानमा प्रहरीले स्कर्टिङलगायत सुरक्षाको बन्दोबस्त गर्ने प्रतिबद्धता जनाइसकेको छ । मन्त्रिपरिषद्ले यातायात सञ्चालन, सुरक्षा र क्षतिपूर्तिसम्बन्धी कार्यविधि पारित गरिसकेको छ । तर, यातायात व्यवसायी ढुक्क हुन सकेका छैनन् । यसअघि व्यवसायीहरुले यातायातका साधन निर्बाध सञ्चालन गर्ने र बन्दको प्रतिवाद गरी सफलतापूर्वक संविधानसभाको चुनाव सफल पार्ने प्रतिबद्धता जनाएका थिए । नेपाल यातायात मजदुर संघले पनि संविधानसभाको चुनाव राष्ट्रिय पर्व भएकाले यसलाई सफलतापूर्वक सफल बनाउन सबै मजदुर युनियन सहमत भइसकेको जनाएको थियो । तर, व्यवसायी  भने जोखिम मोलेर सवारीसाधन चलाउन मानसिक रुपमा तयार हुन सकेनन् ।
आमहड्तालले आमजनजीवन अस्तव्यस्त बनिरहेको देखिन्छ । सरकारले संविधानसभा चुनावका लागि सबै तयारी पूरा गरिसकेको छ । मुलुक नै चुनावमय बनिरहेको अवस्थामा हड्तालस्वरुप बन्द गरिँदा सर्वत्र आलोचना बढिरहेको पाइन्छ । बन्दकर्ता सार्वजनिक सवारीसाधनमा आगजनी र तोडफोडमा उत्रिरहेको अवस्था छ । हड्तालका क्रममा ग्यारेजमा रोकिराखेका सवारीसाधनमा समेत तोडफोड र आगजनी गरिएपछि यातायात व्यवसायी थप आतंकित बनेका छन् । सरकारले सुरक्षा व्यवस्थाका लागि कुनै कसर बाँकी नराखे पनि यातायात व्यवसायीहरुले अनावश्यक जोखिम मोल्न र आमहड्तालको प्रतिकार गर्ने साहस जुटाउन सकेका छैनन् । गृह मन्त्रालयले यातायात सञ्चालनलाई व्यवस्थित गर्न र सुरक्षा व्यवस्था मिलाउन सबै मन्त्रालय तथा सरोकारवाला निकायलाई निर्देशन दिएको छ । प्रहरीले सवारी गस्ती र पेट्रोलिङ गरिरहेको देखिन्छ, तर विगतका घटना र सम्भावित जोखिमलाई मध्यनजर गरी व्यवसायीहरु भने पूर्ण रुपमा यातायात सञ्चालन गर्न तयार देखिएका छ्रैनन् ।
नेपालमा बन्द संस्कृतिको अन्त्यका लागि सरकारी तथा निजी क्षेत्रका सबै संघसंस्था चिन्तित भएका छन् । पटकपटकको बन्द र आमहड्तालले मुलुक अस्तव्यस्त भइसकेको छ भने आमजनता आजित भइसकेका छन् । यसअघिका कतिपय आमहड्तालहरुमा आमजनताले स्वःस्फूर्त प्रतिकार गरी बन्दजस्ता अवाञ्छित क्रियाकलापविरूद्ध कडा प्रतिवाद गरेका थिए । अपराधका रुपमा मौलाउँदै गएको बन्दविरूद्ध अन्तर्राष्ट्रिय समुदायले समेत चर्को विरोध गरिरहेका छन् । अहिले अत्यावश्यक दैनिक उपभोग्य वस्तु ढुवानी गर्ने सवारीसाधनसमेत निर्बाध चल्न नसक्दा जनताले सास्ती पाइरहेका छन् । बन्दले आमनेपालीमा निराशाबाहेक अरु केही प्रभाव पार्न सकेको छ्रैन । संविधानसभाको चुनावको माहोलले केही हदसम्म आशा जगाएको स्थितिमा चुनाव बहिष्कार गर्ने समूहको बन्दले थप आतंकित बनाएको छ । यस्तो अवस्थामा जनताले प्रतिरोध गर्ने र झडपको स्थितिसमेत आउन सक्ने स्थिति विद्यमान देखिएको छ । जनताको मनमा त्रास र आतंक सिर्जना गराएर कुनै पनि राजनीतिक उपलब्धि हासिल हुन सक्दैन । यस्ता गतिविधिले आमजनताबीच आलोचित मात्र बनाउँछ भन्ने कुरा आयोजक दलहरुले मनन् गर्नुपर्छ ।