फर्जी मतदाताविरूद्ध चनाखो बन्न एमालेको निर्देशन

नारायणगढ । नेकपा एमाले पोलिटव्यूरो सदस्य एवम् नारायणी अञ्चल इञ्चार्ज काशिनाथ अधिकारीले जिल्लाका कुनै पनि बुथमा फर्जी मत हाल्ने प्रयास गर्ने एमाओवादी र कांग्रेसको प्रयासलाई हरहालतमा चकनाचुर पार्न कार्यकर्ताहरुलाई निर्देशन दिनुभएको छ ।
एमाले जिल्ला पार्टी कार्यालय चितवनमा निर्वाचन क्षेत्र ३ र ४ का प्रतिनिधिहरुलाई प्रशिक्षण दिदँै अधिकारीले फर्जी मत हाल्ने कांग्रेस र एमाओवादीको पुरानो बानी भएकोले यसपटक उनीहरुको सपनालाई धुलोमा मिलाउन कुनै पनि कसर बाँकी नराख्न निर्देशन दिनुभएको छ । ‘मतदान केन्द्रको सुरक्षा, मतदाताको सुरक्षा, व्यवस्थित मतदान प्रकृया, अशक्त र अपांगहरुलाई मतदान केन्द्रमा ल्याउने व्यवस्था सम्बन्धित क्षेत्रले मिलाउनुपर्छ’ उहाँले भन्नुभयो, ‘तर बुथभित्र फर्जी नाममा मतदानका लागि पुग्नेहरुलाई रोक्न प्रतिनिधिहरु चनाखो हुनुपर्छ’ ।
प्रशिक्षण कार्यक्रममा एमाले चितवनका अध्यक्ष जगन्नाथ थपलियाले  एमालेले बिगतमा मतदान केन्द्रको सुरक्षा गर्न, आफ्नो उपस्थिति देखाउन नसक्दा, माओवादीको डर र धम्कीमा पर्दा निर्वाचनमा पराजय भोगेका कुरालाई ख्याल गर्न भन्दै जनताको घरघरमा पुगेर मागेको मतको रक्षा गर्न कार्यकर्ता तथा प्रतिनिधिहरुलाई निर्देशन दिनुभयो ।
थपलियाले विगतमा माओवादीले मरेका मानिसको नाममा समेत मतदान गरेको स्मरण गर्दै वास्तविक मतदाता को हो होइन भन्ने बारेमा चनाखो बन्न प्रतिनिधिहरुलाई सचेत गराउनुभयो । प्रशिक्षण कार्यक्रममा एमाले केन्द्रीय सदस्य देवी ज्ञवाली, राष्ट्रिय प्रतिनिधि परिषदका सदस्य विजय सुवेदी, जगन्नाथ भण्डारी, पार्टी सचिव तेजेन्द्रबहादुर खड्काले मतदान केन्द्रमा गर्नुपर्ने काम, प्रतिनिधिले निभाउनुपर्ने भूमिका, मतको सुरक्षालगायतका वारेमा प्रशिक्षण दिनुभएको थियो ।