बन्द गर बन्द आतङ्क

संविधानसभाको निर्वाचन जतिजति नजिकिँदै छ, त्यतित्यति अधिकांश नागरिकमा चासो र अभिरूचि जागेको पाइन्छ । तर, अहिले विडम्बना नै मान्नुपर्ने भएको छ कि केही राजनीतिक दलहरु निर्वाचन बहिष्कारको नाममा अहिलेदेखि नै विभिन्न बाधा, व्यवधान सिर्जना गरेर आत्मरतिमा रमाउने प्रयास गरिरहेका छन् । भोलि कार्तिक २५ गतेदेखि गर्ने भनिएको मंसिर ४ सम्मको लामो बन्द हड्ताल हुने भन्ने आयोजकहरुको प्रचारबाजीका कारण जनता अहिलेदेखि नै आतंक र भयको वातावरणमा बाँच्न बाध्य देखिएका छन् । निर्वाचनविरोधी यो कार्यले समग्रमा नेपाल र नेपाली जनताको हित हुन अवश्य पनि सक्नेछैन ।
कुनै पनि शासनप्रणालीमा आफ्नो हकको प्रयोग गर्दा अरुको अधिकारको ख्याल गर्ने गरिन्छ । यो एक स्थापित मान्यता, संस्कार र परिपाटी पनि हो । तर, नेपालमा भने विगत लामो समयदेखि यो प्रजातान्त्रिक संस्कारको विकास हुन सकेको पाइँदैन । संविधान लेख्नेजस्तो मह¤वपूर्ण निर्वाचनलाई समेत ठाडै उपेक्षा गरेर बहिष्कारवादी पक्षले के गर्न खोजेको हो भन्ने प्रश्न अहिले आमनागरिकले गरिरहेका छन् । लामो समयको कथित बन्दको कालो छायामुनि उभिएर मतदाताले मतदान गर्न सक्ने वातावरण अवश्य पनि सिर्जना हुन सक्तैन ।
ठूलो त्याग र बलिदानपश्चात् प्राप्त भएको गणतन्त्र यस्तै नकारात्मक चरित्रका कारण कतै धरापमा त पर्ने होइन भनेर आशंका पनि हुन थालेको छ । जुनसुकै असहमतिलाई पनि बन्द र हड्तालको माध्यमबाट यौटा समूहले आक्रोश पोखिरहँदा अर्को ठूलो पक्ष आतंकित र प्रताडित बन्नुपर्ने स्थिति अब सदाका लागि बन्द हुनुपर्छ ।
हिजो प्रचण्डको चितवन भ्रमण असफल पार्न असन्तुष्ट समूहले सार्वजनिक यातायातका साधनहरु चल्न दिएनन् । फलस्वरुप, आफ्नो दैनिक जीवन सञ्चालन गर्न गाडी चढ्नैपर्ने बाध्यतामा रहेका व्यक्तिहरु आफ्नो कामबाट वञ्चित हुन पुगे । यौटाको रिस अर्कोलाई पोख्ने यो गलत प्रवृत्ति भोलिदेखि नै अन्त्य हुनुपर्छ भन्ने हामी चाहन्छौँ ।
राजनीतिलाई मूल्य र मान्यताको आधारमा स्थापित गराउन सकियो भनेमात्र त्यसले जनविश्वास र आस्था प्राप्त गर्न सक्तछ । नेपालका राजनीतिकर्मीहरुले यो यथार्थलाई आत्मसात् गर्ने प्रयास नै गरेनन् । बन्द र हड्तालजस्ता आमजनतामा निराशा र नकारात्मक प्रभाव पार्ने कामलाई नै उनीहरु आफ्नो सफलता ठानिरहेका छन् । जिम्मेवार राजनीतिक दलहरुले भोलिदेखि हुने भनिएको बन्द फिर्ता लिएर विरोधका अन्य कार्यक्रमहरु सञ्चालन गरेमा त्यो स्वीकार्य हुन सक्नेछ । जसरी भए पनि यो लामो बन्द फिर्ता लिन हामी एक पटक फेरि आग्रह गर्दछौँ ।