देश परिवर्तन गर्ने मौका देऊ ः प्रचण्ड

भरतपुर । एनेकपा माओवादीका अध्यक्ष पुष्पकमल दाहाल प्रचण्डले आगामी चुनावमा आफ्नो पार्टीले बहुमत ल्याउनेमा आफू ढुक्क रहेको बताएका छन् । जनताले इतिहासमा जुनसुकै पार्टीलाई पनि परिवर्तनका लागि एउटा मौका दिने भएकाले अबको चुनावमा जनताले आफूहरुलाई देश परिवर्तनका लागि मौका दिने उनको भनाइ थियो ।
मेची–महाकाली अभियान लिएर देश दौडाहामा शनिबार चितवनको भरतपुर आएका एकीकृत नेकपा माओवादीका अध्यक्ष प्रचण्डले एमाओवादीको पक्षमा भोट हाल्न जनता आतुर रहेको बताए । कात्तिक २० गते मेचीको काँकडभिट्टाबाट अभियान थालेका एमाओवादी शनिबार बिहान मकवानपुरको हेटौंडाबाट सम्बोधन थालेर चितवन हुँदै शनिबार साँझ नवलपरासी पुगेको छ । सम्बोधनका क्रममा एमाओवादी नेताहरुले अभियानलाई आँधीको संज्ञा दिएका छन् ।
भरतपुरको केन्द्रीय बस टर्मिनल अगाडिको चौरमा आयोजित सभामा अध्यक्ष दाहालले देश दौडाहाको तेस्रो दिनमै माओवादीको पक्षमा जनलहर आएको दावी गरेका छन् । ‘मेचीबाट अभियान थाल्दा हामी हावा थियौँ अहिले गति तीव्र भएर आँधीको रुप लिइसकेको छ, अब एमाओवादीलाई कसैले पराजित गर्न सक्दैन’ उनले भने । आफूहरुको परिवर्तनका एक्लो शक्ति रहेको अध्यक्ष दाहालको दावी थियो ।
यसअघि पूर्वीचितवनको रत्ननगरमा आयोजित सभामा उनले एमाओवादीको नेतृत्वमा स्थिर सरकार बनेपछि मुलुक आर्थिक समृृद्धितर्फ उन्मुख हुने बताए । तीनवटा सभामा सम्बोधन गरेका माओवादी नेता डा. बाबुराम भट्टराईले संविधानसभा निर्वाचन २०७० आफूहरुले जसरी पनि जित्नुपर्छ ।
रत्ननगर र पर्सा बाजारमा पूर्व–पश्चिम राजमार्गको छेउमै आयोजना गरिएको सभाले यातायात आवगमन प्रभावित भएको थियो । पार्टीका उच्च तहका नेताहरु आउने भएपछि एनेकपा माओवादी कार्यकर्ता झण्डासहित चितवन र मकवानपुरको सीमाना पुगेका थिए ।
त्यस्तै, प्रचण्डले  शनिबार पूर्वीचितवनको पर्साचोक र रत्ननगरको टाँडीचोकमा पनि सम्बोधन गर्दै एमाओवादीले पाँच वर्षसम्म सरकार चलाउने वातावरण बने चमत्कारिक परिर्वतन ल्याउने दावी गरे ।
उनले १५ वर्षमा गरिबी अन्त्य, २० वर्षमा दक्षिण एसियामा नमुना देश र ४० वर्षमा विश्वकै धनी देश बन्ने दावी गर्नुभयो । हरेक परिवर्तनपछि परिवर्तन ल्याउने दलले सरकार चलाउने मौका पाएको इतिहास रहेको भन्दै अब सरकारको नेतृत्व एकीकृत नेकपा माओवादीले गर्न पाउनुपर्ने उनले बताए । ‘राष्ट्रको नेतृत्व गर्ने जिम्मेवारी दिनुहोस्’ उनले भने, ‘हामी मुलुकलाई संमृद्ध बनाउन चाहन्छौँ ।’
संविधानसभाको निर्वाचनलाई महाभारतको संज्ञा दिँदै प्रचण्डले यसलाई जुनसुकैै हालतमा जित्नैपर्ने बताए । ‘अहिलेको निर्वाचन महाभारतको लडाइँ हो,’ उनले भने, ‘संविधान सुनिश्चितताको लागि पनि यो लडाइँ एमाओवादीले जित्नैपर्छ ।’
संविधानसभा र गणतन्त्र माओवादीको एजेण्डा रहेको बताउँदै उनले दुबै एजेण्डालाई सार्थक बिन्दुमा पु¥याउन यसपटक जनताले एमाओवादीलाई दुई तिहाईसहितको बहुमत दिनुपर्नेमा जोड दिनुभयो । चुनाव बहिष्कार गरिरहेको नेकपा–माओवादीले बन्द गरेर एमाओवादीको चुनावी अभियानमा सहयोग गरेको प्रचण्डको भनाइ थियो ।
एकीकृत नेकपा माओवादीका अर्का नेता बाबुराम भट्टराईले एक वर्षभित्र संविधान जारी गरी मुलुकलाई समृद्धितर्फ लैजान एकीकृत नेकपा माओवादीलाई दुई तिहाई मत दिनुपर्ने बताए ।
मेची महाकाली अभियान अन्तर्गत पूर्वीचितवनको खैरहनी पर्सा बजारमा आयोजित कार्यक्रममा सम्बोधन गर्दै भट्टराईले यसअघि पार्टीले बहुमत नपाएकाले संविधान जारी हुन नसकेको बताए । त्यस्तै प्रचण्डले तोकिएकै समयमा संविधानसभा निर्वाचन सम्पन्न गरी छाड्ने प्रतिबद्धता व्यक्त गर्नुभएको छ ।
त्यस्तै, एमाओवादी क्षेत्र नं २ नवलपरासीले कावासोतीमा आयोजना गरेको चुनावी सभालाई सम्बोधन गर्दै अध्यक्ष दाहालले आफूहरुले सुरु गरेको मेची–महाकाली जागरण अभियानको मूल उद्देश्य नै निर्वाचन सफल पार्नु हो भने । उनले काँग्रेस बुढो रुख र भित्र धोद्रो भइसकेको तथा एमाले पतनको बाटोमा रहेकाले मुलुकको भाग्य र भविष्य निर्माणका लागि एमाओवादीलाई दुईतिहाई बहुमत दिनुपर्ने बताए ।