शङ्कास्पद वस्तु हटाइयो

भरतपुर । एकीकृत नेकपा (माओवादी)का अध्यक्ष पुष्पकमल दाहालको मेची महाकाली यात्राअन्तर्गत आज हुने चितवनको सभालाई लक्ष्य गरी नेकपा–माओवादीले जिल्लाका सात ठाउँमा राखेका शङ्कास्पद वस्तुलाई प्रहरीले हटाएको छ ।
पूर्वी चितवनको भण्डारा, रत्ननगर, भरतपुर र रामनगर क्षेत्रमा खतरा लेखी राखिएका त्यस्ता वस्तु भेटिएको प्रहरीले जनाएको छ ।
जिल्ला प्रहरी कार्यालय चितवनका प्रवक्ता प्रहरी नायब उपरीक्षक सञ्जय राउतका अनुसार शङ्कास्पद अवस्थामा भेटिएका दुई जनालाई प्रहरीले आज बिहान रत्ननगरबाट नियन्त्रणमा लिएको छ । प्रवक्ता राउतका अनुसार एक जनाको साथबाट बम बनाउन प्रयोग गरिने तारलगायत सामग्रीसमेत बरामद गरिएको छ ।
त्यस्तै, नेकपा–माओवादी मकवानपुरले मकवानपुर बन्दको आह्वान गर्दा हेटाँैडाबाट चल्ले लामो तथा छोटो दूरीका सबै यातायातका सेवा अवरुद्ध गरेको छ ।
त्यस्तै, नवलपरासीको प्रगतिनगर क्याम्पस चोक र भेडाबारीमा फेला परेको शङ्कास्पद वस्तु बम नरहेको प्रहरीले जनाएको छ ।
बम भएको आशङ्कामा स्थानीयले प्रहरीलाई खबर गरेलगत्तै घटनास्थलमा पुगेको प्रहरीले पनि बम नभएको अनुमान गरेको थियो । नेपाली सेनाको बम निष्क्रिय टोलीले प्रगतिनगर क्याम्पस चोकमा पहेँलो बोरामा बेरेर राखिएको वस्तु निष्क्रिय पार्ने क्रममा ढुङ्गा र गिट्टी फेला परेका थिए । रासस