मतदाताको चाहना ः विकास निर्माण र जीविकोपार्जन

–होमनाथ सापकोटा
रत्ननगर । चितवन क्षेत्र नंं. १ र २ का मतदाताले दलका उम्मेदवारसँग नयाँ संविधान भन्दा पनि विकास निर्माण र जीविकोपार्जनको आधार बनाइदिन आग्रह गरेका छन् । नेता सहरमुखी भएका कारण ग्रामीणस्तरमा विकासका योजनाहरु पुग्न नसकेको भन्दै मतदाताले उम्मेदवारसँग भने ‘तपाईहरुको ध्यान हाम्रो गाउँतर्फ पनि केन्द्रित हुनुप¥यो ।’ चुनाव जितेर गएपछि नेताहरु गाउँमा फर्केर नआउने नियतिप्रति मतदाताले उम्मेदवारलाई सचेत गराउने गरेका छन् ।
चुनाव जितेपछि गाउँको विकास गर्नुप¥यो बछौली ६ का कुलबहादुर पौडेलले एमाले उम्मेदवार सुरेन्द्र पाण्डेलाई भने ‘संविधान पनि बनाउनु होस्, गाउँको विकास पनि गर्नुहोस् । गाउँका सड्क बिग्रिएका छन, सिंचाई गर्ने नहर छैन, यसतर्फ पनि नेताहरुको ध्यान जाओस्’ ८० वर्षीय पौडेलले भने ।
जुटपानी–१ खोलेसिमलका पुष्पराज भट्टराईले संविधान भन्दा पनि हाम्रो सड्क, कुलो र कृषिमा अनुदानको व्यवस्था गरिदिन आग्रह गरे । उता विपन्न समुदायको पीडा बेग्लै छ । भोट माग्न घरदैलोमा पुगेका उम्मेदवारहरुसँग आर्थिक र सामाजिक रुपले पछाडि पारिएका समुदायले जीविकोपार्जनको आधार बनाइदिन समेत आग्रह गरेका छन् । हामी घर न घाटको अवस्थामा छौँ बिहान–बेलुका हातमुख जोर्ने र ओत लाग्ने घरको व्यवस्था गरिदिनु प¥यो बछौली–३ मालपुरकी भगन्ती मुसहरले भनिन् ।
मतदाताको पीरमर्का बुझेका क्षेत्र नं. १ का उम्मेदवार सुरेन्द्र पाण्डेले एमालेले बहुमत ल्याए वृद्धभत्ता दोब्बर बनाउने बताए । एमालेको नौमहिने सरकारको पालामा एमाले नै वृद्धवृद्धालाई भत्ता दिन सुरु गरेको भन्दै उनले आसन्न संविधानसभाको निर्वाचनमा बहुमत ल्याए बृद्धभत्ता दोब्बर बनाउने स्पष्ट पारेका छन् । एमालेको चुनावी अभियानअन्र्तगत शुक्रवार पूर्वी चितवनको बछौलीमा आयोजित घरदैलो कार्यक्रममा बोल्दै उनले सुकुम्वासी समस्या समाधानको निर्वाचन सकिएलगत्तै पहल सुरु गर्ने प्रतिबद्धता जनाए । उनले देशमा शान्ति र संविधानको विषयमा एमाले गम्भीर रहेको बताए ।
चितवन क्षेत्र नं. २ मा घरदैलोमा व्यस्त रहेका एमाले उम्मेदवार कृष्णप्रसाद खनालले यस क्षेत्रका मतदाताले नयाँ संविधान र विकास निर्माण चाहेको बताए । प्रत्येक मतदाताको मुखमै नयाँ संविधान र निकास झण्डिएको छ’ उनले भने । त्यस्तै नेपाली काँग्रस क्षेत्र नं. १ का उम्मेदवार राजेन्द्रप्रसाद बुर्लाकोटीले यस क्षेत्रका जनताले कृषि क्षेत्रको विकास होस भन्ने चाहेको बताए । उनले मतदाताको भावनाको कदर गर्दै कृषि क्षेत्रको विकाससँगै विकासका पूर्वाधार निर्माणमा आफू लागिपर्ने बताए ।
त्यस्तै काँग्रेसका चितवन क्षेत्र नं. २ का उम्मेदवार शेषनाथ अधिकारीले चितवनको पहाडी क्षेत्रहरुलाई पर्यटकीय क्षेत्रको रुपमा विकास गरी त्यहाँ बसोवास गर्ने विपन्न समुदायको जीविकोपार्जनको आधार खडा गरिने बताए । विपन्न चेपाङको समस्याप्रति पनि हामी परिचित छौ उनले भने । उनीहरुको व्यवस्थित आवास निर्माणको प्रक्रिया सुरु भइसकेको र आवश्यक पर्ने अन्य काम गर्न काँग्रेस प्रतिबद्ध रहेको छ ।