कसैले चुनाव रोक्न नसक्नेः कोइराला

भरतपुर । नेपाली कांग्रेसका सभापति सुशील कोइरालाले मंसिर ४ को चुनाव कसैले रोक्न नसक्ने बताउनु भएको छ । नेपाल प्रेस युनियन चितवनले भरतपुर विमानस्थलमा गरेको पत्रकार सम्मेलनमा सभापति कोइरालाले राष्ट्रिय तथा अन्तर्राष्ट्रिय सबै अहिले चुनावको पक्षमा रहेकाले चुनाव नरोकिने बताउनुभयो ।
चितवन क्षेत्र ४ का उम्मेदवारसमेत रहनु भएका कोइरालाले चुनाव प्रचार प्रसारको क्रममा बिहीबार पुनः चितवन आउनु भएको हो । पत्रकार सम्मेलनमा कोइरालाले नेकपा माओवादीका अध्यक्ष मोहन वैद्यको नामै लिएर  माओवादीले समेत शान्तिपूर्ण रूपमा चुनाव बहिष्कार गर्ने जनाएकाले चुनावमा कसैको अवरोध नहुने जिकिरसमेत गर्नुभयो । अहिले भइरहेको उम्मेदवार र तिनका सवारी साधनमाथिको आक्रमणलाई छिटपुट घटनाका रुपमा लिन सबैलाई कोइरालाको आग्रह थियो ।
कार्यक्रम युनियनका अध्यक्ष बसन्त पराजुलीको अध्यक्षतामा सम्पन्न भएको थियो ।
कोइरालाको क्षेत्रमा चहलपहल
यस्तै, कोइरालाले उम्मेदवारी दिएको क्षेत्रमा चुनावी चहलपहल निकै बढेको छ । कोइराला चुनाव लडेपछि अघिल्ला निर्वाचनभन्दा यसपटक चितवनको माहोल तातेको हो । कोइरालाको उम्मेदवारीले कांग्रेस कार्यकर्ता पनि निकै उत्साहित बनेका छन् । विकासको हिसाबले पछि परेको चितवन क्षेत्र नम्बर ४ मा जति नै निर्वाचन भएपनि त्यसको प्रभाव नपरेको गुनासो बढिरहेका बेला कोइरालाले चुनाव जितेपछि भने विकास हुने आशा जनताले गरेका छन । सभापति कोइरालाले रामपुर मेघौली गोलाघाट सडकमार्ग, माडी ठोरी सडकमार्गको स्तरोन्नति र रामपुर सिमरी टाउन कालोपत्रे गर्ने काम आफ्नो योजनामा राखेमा छन् । त्यस्तै पश्चिम चितवन नागरिकलाई स्वास्थ्य सेवाका लागि गुञ्जनगरमा ५० शैयाको अस्पताल स्थापना गर्ने प्रतिबद्धता जनाएका छन् । यसले पनि सो भेगमा विकास हुने आशा पलाएको छ ।
त्यस्तै, उनको कार्ययोजनामा नारायणी राप्ती तटबन्ध गर्ने काम पनि परेको छ । चुनाव प्रचारका लागि विभिन्न कार्यक्रम गरिरहेका छन् । नेपाली कांग्रेस चितवनका सभापति टेकप्रसाद गुरूङले पार्टी सभापतिको उम्मेदवारी समग्र चितवनको गर्व भएको बताए ।