एमालेको दुरगामी योजनाः पाण्डे

भरतपुर । नेकपा एमालेका पोलिटव्यूरो सदस्य तथा चितवनको निर्वाचन क्षेत्र १ का उम्मेदवार सुरेन्द्र पाण्डेले विकास निर्माणका काम गराउन स्थानीयले नेताहरुलाई खबरदारी गर्नुपर्ने बताएका छन् । उनले एमालेको दुरगामी योजना रहेको हुँदा दुईतिहाइ बहुमत दिन आग्रह गरे ।
संविधानसभा निर्वाचनको प्रचारप्रसारको क्रममा बुधबार पर्सामा भएको घरदैलो तथा स्थानीयसँगको कुराकानीमा उनले संविधान निर्माण, क्षेत्रको विकाससंगै राज्यका धेरै काममा सक्रिय हुनुपर्ने नेताहरुलाई स्थानीयले आफ्ना समस्या समाधानका लागि खबरदारी गरिरहनु पर्नेमा जोड दिए । चुनावी प्रचारका लागि सयांै कार्यकर्ता माझ हिँडेका उनले नेकपा एमाले जनताको घरदैलोमा पुगिरहने पार्टी भएकाले आफ्ना समस्या निर्धक्कसँग राख्न आग्रह गरे ।
पूर्वअर्थमन्त्रीसमेत रहेका उनले निर्वाचन जितेपछि गाउँ नफर्कने र स्थानीयको समस्यालाई वास्ता नगर्ने व्यक्तिहरुबाट सचेत रहन आग्रह गरे । उनले भने ‘हामी जनताको घरदैलोमा हिजो पनि थियौँ आज पनि छौँ र भोलि पनि रहन्छाँै, जनताको प्रत्यक्ष चासो राख्नेलाई रोज्नुपर्दछ ।’ युवाहरुको लागि अवसर, वृद्धको लागि सम्मान देशको लागि दुरगामी योजना लिएको नेकपा एमालेलाई मतदान गरी विजयी गराउन आग्रह गरे ।