दलहरूबाट उम्मेदवारका बन्दसूची पेस

काठमाडौँ । आगामी संविधानसभाको निर्वाचनअन्तर्गत समानुपातिक निर्वाचनमा भाग लिन निवेदन दिएका दलमध्ये हालसम्म २७ वटा राजनीतिक दलले उम्मेदवारका बन्दसूची निर्वाचन आयोगको केन्द्रीय कार्यालयमा पेस गरेका छन् । ती दलमध्ये अधिकांश साना दल नै रहेका आयोगका प्रवक्ता वीरबहादुर राईले जानकारी दिनुभयो ।
उम्मेदवारको बन्दसूचीको नामावली प्रस्तुत गर्ने कार्यक्रम ५ बजेसम्म निर्धारण गरिएको छ । सो निर्वाचनका लागि आयोगमा १२४ राजनीतिक दलले यही असोज १४ गते निवेदन दिएका थिए । निर्वाचनमा भाग लिनका लागि आयोगमा १३० राजनीतिक दलले दर्ता गरेका थिए ।
आयोगले आगामी समानुपातिक निर्वाचनमा भाग लिने राजनीतिक दलको अन्तिम नामावली प्रकाशन गरी बिहीबार चुनाव चिह्न प्रदान गरेको थियो । समानुपातिक निर्वाचनमा भाग लिन नचाहने दलले पहिलो हुने निर्वाचनमा भाग लिन पाउनेछन् । आयोगको केन्द्रीय कार्यालयमा समानुपातिक निर्वाचनको कार्यालय राखिएको छ । सो निर्वाचन प्रयोजनका लागि आयोगका सचिव नगेन्द्र दाहाललाई अधिकृत तोकिएको छ ।
गत संविधानसभाका ५४ राजनीतिक दलले समानुपातिक निर्वाचनमा भाग लिन निवेदन दिएका थिए । तीमध्ये २५ दलको मात्र संविधानसभामा सहभागिता रहेको थियो । उम्मेदवारका बन्दसूचीमा नामावली प्रस्तुत गर्न राजनीतिक दलका प्रतिनिधिहरू आयोगमा पुगेका थिए । आयोगको हातामा उम्मेदवारका बन्दसूचीको नाम प्रस्तुत गर्न नजानेर केही राजनीतिक दलका प्रतिनिधि अलमल परेका देखिन्थ्यो । रासस