कावासोती । तडकभडकसहित नवलपरासीमा क्रियाशील विभिन्न राजनीतिक दलका उम्मेदवारले आफ्नो मनोनयनपत्र जिल्ला निर्वाचन कार्यालयमा दर्ता गराएका छन् । छ वटा निर्वाचन क्षेत्र रहेको नवलपरासीमा एमाओवादी, नेपाली काँग्रेस, नेकपा (एमाले) र मधेसवादी दलले उम्मेदवारी दर्ता गराएका हुन् ।
अघिल्लो संविधानसभामा दोस्रो ठूलो दल रहेको काँग्रेसका दुई नेताले बागी रुपमा स्वतन्त्र उम्मेदवारी दर्ता गराएका छन् । नवलपरासीको निर्वाचन क्षेत्र नं ४ मा क्षेत्रीय सभापति गुणनिधि तिवारी र क्षेत्र नं ५ मा स्वास्थ्य विभागका सदस्य राधेश्याम पाठकले स्वतन्त्र उम्मेदवारको रुपमा मनोनयन दर्ता गराएका हुन् । काँग्रेसले निर्वाचन क्षेत्र नं ४ मा जिल्ला सभापति देवेन्द्रराज कँडेल र क्षेत्र नं ५ मा विक्रम खनाललाई टिकट दिएपछि उनीहरु बागी बनेका हुन् ।
क्षेत्र नं ३ मा एमालेका पार्टी सचिव विष्णु पौडेलले उम्मेदवारी दिने भनिए पनि अन्तिम समयमा पूर्व जिल्ला सचिव कृष्ण पौडेललाई उम्मेदवारी दर्ता गर्न लगाइएको छ । एक महिलासहित ६ क्षेत्रमा एमालेले उम्मेदवारी दिएको हो । एमाओवादी र एमालेले एक÷एक जना महिला उम्मेदवार उठाएका छन् । रासस
Discussion about this post