बाढी प्रभावित क्षेत्रमा स्कुल भवन

माडी । माडीको बाढी प्रभावित क्षेत्र रतनी धोवाहामा आइकन राउण्ड टेवल सेबनले स्थानीय प्राविमा दुई कोठे भवन निर्माण गरिदिएको छ ।
०६९ चैत्रदेखि निर्माण सुरू भएको भवन जेष्ठ २० मा निर्माण सम्पन्न गरी उद्घाटन गरिएको छ । क्षेत्र नं. ५ का एमाओवादीका उम्मेदवार अमिक शेरचनले नवनिर्मित भवनको उद्घाटन गर्नुभएको हो ।
राप्रावि रतनि धोवाहामा रहेका तीनवटा भवनहरुमा बढ्दो विद्यार्थिको चापलाई मध्यनजर गर्दै भवन निर्माणमा सात लाख रुपैयाँ सहयोग गरेको सामाजिक संस्था राउण्ड टेवलका अध्यक्ष विशाल अग्रवालले बताउनुभयो ।
नयाँ भवनमा करिव ८० जना विद्यार्थीहरुले पढ्न सक्ने छन् । विद्यालय व्यवस्थापन समितिका अध्यक्ष रोहित महतोले विद्यालयमा कक्षा एकमा पढ्ने विद्यार्थीहरु अझै पनि चिसो भुइँमा बसेर पढ्नुपर्ने वाध्यता रहेको बताउनुहुन्छ । दलित र सिमान्तकृत बोटे सहनी जातको बाहुल्यता रहेको सो क्षेत्रमा अधिकांश बाढीबाट विस्थापितहरु रहेको पाइन्छ । विद्यालयका प्रधानाध्यापक विश्वनाथ महतोले माविलाई निमाविका रुपमा विस्तार गर्ने कार्ययोजना अघि बढाइने जानकारी दिनुभयो ।
चारैतिर रतनी, मगुवई र रेवा खोलाले घेरिएको धोवाहा बस्तीमा जंगली जनावरले पनि सास्ती दिने गरेको स्थानीयको भनाइ छ । सो विद्यालयको टिनको छाना जीर्ण, खानेपानी र शौचालयको अभाव, शिशु शिक्षिकाको तलब न्यून, पुस्तकालयको अभाव रहेको शिक्षकहरुले बताएका छन् ।