क्यान्सर पीडितलाई आर्थिक संकलन

सौराहा । क्यान्सर रोगबाट पीडित डिलकुमारी परियारको उपचारका लागि बछौलीमा आर्थिक संकलन गरिएको छ ।
रत्ननगर–१८ सौराहा निवासी परियारको उपचारका लागि स्थानीय युवाहरुको सक्रियतामा आर्थिक संकलन गरिएको हो । दाहिने खुट्टाको जोर्नीमा क्यान्सर भएकी परियारको आर्थिक अभावका कारण उपचार हुन सकेको थिएन । कमजोर आर्थिक अवस्थाका परियारका श्रीमान् बुद्धिबहादुरले ऋण धन गरेर दुई लाखसम्म श्रीमतीको उपचारमा खर्चिसके पनि थप उपचारको लागि पैसा नभएर सहयोगको याचना गरेका थिए ।
परियारको आर्थिक अवस्था कमजोर देखेर स्थानीय युवाहरु रामचन्द्र सापकोटा, सिरीलाल परियार, बासुदेव चापागाई, रुक्मणि सुवेदी, नकुल लामिछानेलगायतका युवाहरुको सक्रिएतामा आर्थिक संकलन गरिएको हो । युवाहरुले बुधबार ३७ हजार र बिहीबार १२ हजार गरी ४९ हजार रूपैयाँ संकलन भएको स्थानीय रामचन्द्र सापकोटाले बताए ।
क्यान्सरबाट पीडित डिलकुमारी परियारको उपचारका लागि आर्थिक संकलन गर्न युवाहरुले घरदैलो कार्यक्रम गरी घरघरमा पुगेर आर्थिक संकलन गरेका छन् । एक हस्तामा केमु थेरापी गर्न चार हजार रूपैयाँ लाग्ने र परियारको आर्थिक अवस्थाले धान्न नसके पछि गाउँमा सहयोग संकलन गरिएको सापकोटाले जानकारी दिए । आर्थिक संकलन कार्य अझ एक दुई दिनसम्म गरिने स्थानीय युवाहरुले बताएका छन् ।