भरतपुर । सार्वजनिक यातायातका चालक र सहचालक सचेत भएमा मानव बेचविखनलाई न्युनिकरण गर्न सकिने सोमबार मानव बेचविखनविरुद्ध जिल्ला कार्यदलले गरेको अभिमुखीकरणका बक्ताहरुले बताएका छन् ।
कार्यक्रमका सहभागीहरुले मानव वेचविखन तथा ओसार पसारमा सार्वजनिक यातायातका साधनको प्रयोग गरिने भएकोले सवारीचालक तथा परिचालकहरु सचेत हुनुपर्नेमा जोड दिएका छन् । सभासद् अञ्जनी श्रेष्ठले कार्यक्रममा चालकहरुले सानो सानो कुरामा ध्यान दिएर आफ्नो गाडीमा कस्ता प्रवृत्तिका यात्रुहरु सवार छन् भनेर सचेत भएमा मानव ओसारपसारमा कमी आउने बताइन् ।
कार्यक्रममा सामुदायिक सेवा केन्द्रकी अध्यक्ष मीना खरेलले भारतहँुदै अहिले अन्य देशमा समेत नेपालीहरु बेचिने गरेको र नेपाल ट्रान्जिट प्वाइन्ट बन्दै गएको भन्दै सवारी चालक सहचालकहरुलाई गाडीमा यात्रा गरिरहेका यात्रुहरुमाथि शंका लागेमा नजिकको प्रहरी चौकीमा खबर गर्न आग्रह गरेकी छन् ।
त्यसैगरी अधिकारकर्मी एवम् अधिवक्ता फूलमाया रानाभाटले मानव बेचविखनको फैलदो अवस्था र कानुनी सजाएका बारेमा जानकारी गराएकी थिइन् ।
Discussion about this post