स्वाइन फ्लुको ‘हेल्प डेस्क’ प्रभावहीन

रत्ननगर । चितवनको भरतपुर अस्पतालमा स्वाइन फ्लुका बिरामीको सहजताका लागि स्थापना गरिएको हेल्प डेस्क प्रभावहीन भएको छ ।
उक्त डेस्कमा खासै मानिस सोधीखोजीका लागि आउने गरेका छैनन् । डेस्कमा चैत १३ देखि १७ गतेसम्म २७ जनाले मात्रै जानकारी लिएका छन् । त्यसमा पनि अन्य अस्पतालबाट पठाइएका बिरामीले जानकारी लिएको पाइएको छ ।
डेस्कमा बस्ने कर्मचारी निलम गौतम खासै मान्छे नआउने गरेको बताउँछिन् । आएकाहरू रोग के हो, कसरी उपचार हुन्छ, टिकट कहाँ काट्ने भनेर सोध्ने गरेका छन् ।
आउनेलाई जनस्वास्थ्यले दिएको पर्चा वितरण गर्ने गरेको गौतमले बताए । हेल्प डेस्कमा अन्य कामले आएका र अन्य रोगका बिरामीले बढी सोधखोज गर्ने र बिरामीको उपचार प्रक्रियाबारे बुझ्ने गरेका छन् ।
स्वाइनफ्लुका बिरामी बढ्न थालेपछि डेस्क स्थापना गरिएको हो । जिल्लामा परीक्षणका लागि पठाइएका ३५६ बिरामीमध्ये १२१ जनामा स्वाइनफ्लु पुष्टि भएको छ । चितवनका मात्रै १०१ जना बिरामी छन् भने अरु बिरामी बाहिरी जिल्लाका छन् ।

चेतना दिन विद्यार्थी सक्रिय  
स्वाइन फ्लुको बारेमा सर्वसाधारण जनतालाई जानकारी दिने उद्देश्यले बुधबार बालकुमारी कलेजका विद्यार्थीहरुले सचेतनामूलक कार्यक्रमको आयोजना गरेका छन् ।
उनीहरुले समुदायमा स्वाइन फ्लुसम्बन्धी जानकारी दिन पर्चा पम्प्लेटको माध्यमबाट प्रचार प्रसार गरेको कार्यक्रम संयोजक निश्चल सापकोटाले जानकारी दिए । आफूहरुले सर्वसाधारणहरुलाई स्वाइन फ्लुका लक्षण, यसले प्रभाव पार्न सक्ने व्यक्तिहरु तथा यसबाट बच्ने उपायका बारेमा प्रष्ट पार्ने प्रयास गरेको उनले बताए ।
कार्यक्रमलाई भरतपुर उपमहानगरपालिका, जिल्ला जनस्वास्थ्य कार्यलय चितवन र बालकुमारी कलेज, शिक्षण अस्पताललगायतले सहायता गरेका छन् । कार्यक्रम बालकुमारी कलेजका सहप्राचार्य चुननारायण श्रेष्ठको अध्यक्षतामा कार्यक्रम भएको थियो ।