उखु किसानको आन्दोलनमा झडप

–रामकुमार श्रेष्ठ
नवलपरासी । उखुको उचित मूल्य निर्धारण गर्न माग गर्दै नवलपरासीका उखु किसानहरु बुधबारदेखि आन्दोलित भएका छन् । उनीहरुले बुधबार नवलपरासीको बेलाटारीमा प्रधानमन्त्री, उद्योग मन्त्रीलगायतका मन्त्रीहरुको पुत्ला दहन गरेका छन् ।
उखुको सिजन सकिन लाग्दासम्म पनि सरकारले उखुको मूल्य निर्धारण गर्न नसकेको भन्दै किसानहरु आन्दोलित भएका हुन् ।
पुत्ला दहनको क्रममा प्रहरी र उखु किसानबीच केहीबेर झडपसमेत भएको थियो । झडपमा कुनै अप्रिय घटना भने भएको छैन ।
गत वर्ष उखुको मूल्य प्रतिक्विन्टल ४ सय ७६ रूपैयाँ निर्धारण गरिएको थियो । यस वर्ष उखु खेतीमा बढेको किसानको लागतअनुसार मूल्य बढाएर निर्धारण गर्नुपर्ने र कम्तीमा गत वर्षको बराबर मूल्य तोक्नुपर्ने उखु उत्पादन कृषक संघर्ष समिति नवलपरासीका अध्यक्ष उमेश यादवले बताए ।
किसानहरुले यस वर्ष मूल्य निर्धारण हुन नसक्दा पेश्की रकमसमेत पाउन सकेका छैनन् । नवलपरासीमा उत्पादन भएको अनुमान गरिएको २५ लाख क्विन्टल उखुमध्ये २२ लाख क्विन्टल उखु किसानहरुले चिनी मिलमा क्रसिङका लागि दिएका छन् ।
झण्डै १० दिनअघि नै चिनी मिलहरुले उखुको क्रसिङ कार्य सकिसकेको छ भने किसानहरुको खेतमा रहेको उखु अधिकांश सकिएको छ ।
किसानहरुले यस वर्ष झण्डै ७५ करोड रूपैयाँ पेश्की रकम पाएका छैनन् । उखु ढुवानी गरेको एक साताभित्र सरकारले मूल्य नतोक्नुअघि प्रतिक्विन्टल तीन सय ५० रूपैयाँ भुक्तानी दिने सहमति भए पनि किसानहरुले एक पैसा पनि पेश्की नपाएको स्थानीय किसान मुक्तिनाथ पाण्डेले बताए ।
नवलपरासीमा लुम्बिनी चिनी कारखाना, इन्दिरा सुगर मिल, बागमती सुगर मिलसहित चार वटा चिनी कारखाना रहेको छ । पटकपटक मूल्य तोक्न माग गरिए पनि सरकार मूल्य तोक्न उदासिन भएकोले आन्दोलनमा उत्रिन बाध्य भएको उखु किसान दीपकराज शर्माले बताए । किसानहरुले शुक्रबारदेखि चिनी मिलअगाडि धर्ना दिने जनाएका छन् ।