संविधानसभालाई बन्धक राख्नुहुन्न ः अर्थमन्त्री

–बसन्त पराजुली
भरतपुर । अर्थमन्त्री डा.रामशरण महतले संविधान निर्माण प्रक्रिया अगाडि बढाउन ढिलाइ गर्न नहुने बताएका छन् । नेपाल प्रेस युनियन चितवनले शुक्रबार भरतपुरमा आयोजना गरेको पत्रकार सम्मेलनमा बोल्दै उनले संविधान निर्माण प्रक्रिया अगाडि बढाउन माग गरे ।
‘स्थगित भएको संविधानसभाको बैठक बोलाएर संविधान निर्माण प्रक्रिया अगाडि बढाउनुपर्छ’, उनले सभामुख सुवासचन्द्र नेम्वाङको नाम नै लिएर थपे, ‘सहमति हुनै सक्दैन भने सहमतिका नाममा कति दिन संविधानसभालाई बन्धक राख्ने ?’
“संविधानसभाको बैठक यथाशीघ्र डाकेर संविधान निर्माणको प्रक्रिया थाल्नुपर्छ”, उनले भने, ‘संविधानसभालाई लामो समयसम्म स्थगित गरिराख्नु राम्रो संकेत होइन ।” संविधानसभाबाट संविधान बनाउने प्रक्रिया रोक्ने अधिकार कसैलाई पनि नभएको भन्दै अर्थमन्त्री डा. महतले सके सहमतिमा नभए पनि प्रक्रियाबाटै संविधान बनाउनुपर्नेमा जोड दिए ।
‘प्रक्रिया रोकेर संविधानसभाको अधिकार हनन् गर्ने अधिकार कसैलाई छैन”, उनले भने, ‘दलहरुबीचको विवाद मिलाउने नाममा लामो समय संविधानसभा रोक्न मिल्दैन । तुरुन्तै संविधानसभाको बैठक सञ्चालन गर्नुपर्छ ।’
उनले सभामुख सुवासचन्द्र नेम्वाङले यथाशीघ्र संविधानसभाको बैठक डाकेर विवाद मिले पनि नमिले पनि प्रक्रिया अगाडि बढाउनुपर्ने धारणा पनि राखे ।
“संविधानसभा कमजोर बनाउन हुँदैन, बैठक डाकेर टुङ्गोमा पुग्नुपर्छ”, उनको स्पष्ट भनाइ थियो, “सत्तामा रहेका दलहरु संविधान जारी गर्न जेठ १५ भन्दा टाढा जाने पक्षमा छैनन् भन्ने कुरा सबैले बुझे हुन्छ ।”
विवादित विषयमा दलबीच छलफल भइरहेको भए पनि निष्कर्षमा नपुगेको उनको भनाइ थियो । अर्थमन्त्री डा. महतले सहमतिमा पुग्ने कुरामा आफूहरु विश्वस्त रहेको धारणा पनि राखे ।
विपक्षी दलहरुले घोषणा गरेको आन्दोलनको कुनै औचित्य नरहेको भन्दै उनले जनता आन्दोलनको पक्षमा नभएको दावीसमेत गरे । “अहिले आन्दोलन गर्ने बेला होइन्, सहमतिबाट संविधान जारी गर्ने हो । सहमति गर्न छाडेर आन्दोलनमा जानु देशको हितमा छैन ।’ उनले थपे ।
संविधान निर्माण प्रक्रियामा देखिएको मुख्य विवाद संघीयता भएको जनाउँदै उनले राज्य पुनर्संरचना गर्दै गर्दा प्रदेश निर्माणमा विशेषतः आर्थिक पक्षलाई ध्यान दिने हो भने त्यो विवाद समाधान हुने जिकिर गरे ।
“धेरै प्रदेश बनाउँदा वित्तीय स्रोतको अभाव हुनसक्छ । गरिब राष्ट्रका प्रान्तहरु वित्तीय समस्याले असफल हुनसक्छन् । देशको अर्थतन्त्रले धान्ने प्रदेश बनाउन जरुरी छ ”, उनले आफ्नो धारणा राखे ।
उनले सोही अवसरमा देशको आर्थिक विकासका लागि जलश्रोत, कृषि र पर्यटन विकासमा क्रान्ति ल्याउन जरुरी रहेको धारणा पनि राखे । “आगामी आठ वर्षमा नेपाललाई कायापलट गराउने हो भने पहिला कृषि, जलश्रोत र पर्यटनको विकासमा लगानी बढाउनुपर्छ”, उनले भने, “सरकार यही क्षेत्रको विकासका लागि ठोस कार्यक्रम तय गर्न जुटेको छ ।”
माथिको सव न्यूज
‘देश विकासका लागि उत्पादनमूलक कार्यक्रम ’
गैँडाकोट । नेपालमा हरेक क्षेत्र उत्पादनशील रहेकोले यसलाई प्राथमिकता दिएर नीति, योजना बनाएमा देशको विकासले फड्को मार्ने अर्थमन्त्री डा. रामशरण महतले बताएका छन् ।
‘अल्पविकसित मुलुकबाट स्तरोन्नति’ विषयक विजय विकास स्रोत केन्द्रले शुक्रबारबाट सुरू गरेको दुईदिने राष्ट्रिय सेमिनारमा मन्त्री महतले देश विकासका लागि उत्पादनशील क्षेत्रमा लगानी गर्नुपर्ने विचार व्यक्त गरेका हुन् ।
नेपालको  विकास विगत वर्षहरुमा भन्दा केही हदसम्म वृद्धि हुँदै गइरहेको दावी गर्दै उनले आम्दानीमध्ये ८० प्रतिशत आर्थिक स्रोत आन्तरिक स्रोतअन्तर्गत रहेको र २० प्रतिशतमात्र वैदेशिक लगानीमा भर पर्नुपरेको बताए । नेपाली जनता र देशप्रतिको नकारात्मक सोचाइलाई त्यागेर आशावादी हुनुपर्नेमा उनको जोड थियो ।
उनले देशको आर्थिक स्तरोन्नति गर्न राज्यले व्यवसायिक कृषकहरुलाई प्रोत्साहन गर्न छ प्रतिशत ब्याजदरसहित कर्जा उपलब्ध गराउने योजना सुनाए । नेपालमा अहिले केन्द्रदेखि तल्लो तहसम्म राजनीतिक मुद्दालाई मात्रै बहस र छलफलको विषय बनाएका कारण नेपाल अल्पविकसितमै सीमित रहेको उनको विश्लेषण थियो ।
संस्थाका अध्यक्ष वसन्तराज लम्सालको अध्यक्षतामा गरिएको कार्यक्रममा राष्ट्रिय योजना आयोगका सदस्य स्वर्णीम वाग्ले, आयोगका पूर्वअध्यक्ष जगदीशचन्द्र पोखरेल, सभासद् बैजनाथ चौधरी, नवलपरासीका प्रमुख जिल्ला अधिकारी हरिप्रसाद मैनाली, जलस्रोत विभागका इन्जिनियर ज्ञानेन्द्रलाल प्रधानलगायतको उपस्थिति रहेको थियो ।
कार्यक्रममा विज्ञहरुले नेपाललाई अल्पविकसित मुलुकबाट कसरी स्तरोन्नति गर्न सकिन्छ भन्ने विषयमा कार्यपत्र प्रस्तुत गरेका थिए । कार्यक्रम आज शनिबारसम्म जारी रहनेछ ।