देवघाट क्षेत्रको अनुगमन

देवघाट । महिला बालबालिका तथा समाज कल्याण मन्त्रालयले  दिएको अनुदानको प्रभावकारी उपयोग भए नभएको बारे तनहुँको देवघाट क्षेत्र विकास समिति अन्र्तगतका निकायहरुको  बिहीबार अनुगमन तथा सुपरिवेक्षण गरेको छ ।
अनुगमनका लागि मन्त्रालयका सहसचिव शंकरप्रसाद पाठक उपसचिव भरत शर्मा र मीरा शेरचन, नायव सुब्बा नवराजलगायतका टोली देवघाट आएका हुन् । सोही अवसरमा देवघाट क्षेत्र विकास समिति  परिसरमा भएको छलफल कार्यक्रममा देवघाट धाममा देखिएका समस्याहरुको खोजी गदै समधानका लागि कार्यक्रमहरु तय गर्न मन्त्रालय लागि परेको सहसचिव पाठकले बताए  । क्षेत्र विकासका  अध्यक्ष शैलेन्द्र पियाले देवघाट क्षेत्र विकासका लागि छुट्टै ऐनको आवश्यकता भएको बताउँदै देवघाट मा वृद्धवृद्धाका जीवनयापन सहज बनाउने कार्यक्रमको आवश्यकता औल्याए ।
महिला विकास कार्यालयकी अधिकृत रमा अधिकारीले देवघाटमा रहेका वृद्धवृद्धाका लागि गाविस, जिविसलगायतका स्थानीय निकायले योजना तर्जुमामा  नपारेको गुनासो गरिन् ।
अनुगमन कार्यक्रमा जिल्ला प्रशाशन कार्यालय चितवनका प्रशासकीय अधिकृत कमलप्रसाद आर्चाय, महिला विकास कार्यालय चितवनका महिला विकास निरीक्षक रञ्जना पौडेल, क्षेत्र विकासका कार्यकारी निर्देशक जयकृण्ण शर्मा, सदस्य टकंनाथ पौडेल, इन्दिरा आश्रमका सचिव गोमा अर्याललगायतको उपस्थिति रहेको थियो । अनुगमन टोेलीले चितवन तथा नवलपारासीमा  अनुदान दिइएका संघसस्थाहरुको अनुगमन तथा सुपरिवेक्षण गर्ने जनाएको छ ।