सबै पेसी हट्यो

भरतपुर । चितवनमा आज बिहीबारबाट हुने अधिवक्ताहरुको राष्ट्रिय सम्मेलनका कारण चितवन जिल्ला अदालतको सबै पेसी हटेको छ । अदालत कर्मचारीका अनुसार हिजो बुधबार, आज बिहीबार र भोलि शुक्रबार सम्मको पेसी हटिसकेको छ ।
सम्मेलनको आयोजक नै नेपाल बार एसोसिएसन चितवन रहेकाले सबै अधिवक्ताहरु कार्यक्रममै व्यस्त हुने भएपछि पेसी हटेको अदालतका नासु जयनारायण आचार्यले बताए । चितवन अदालतमा हाल दैनिक दुई दर्जन मुद्दा पेसी चढ्दै आएको छ । कार्यक्रममा सहभागिता जनाउन जिल्लाका न्यायाधीशहरु सहभागी हुने र अधिवक्ताहरु पनि सहभागी हुने भएपछि पेसी सारिएको उनले बताए ।
आगामी आइतबारबाट भने तालिकाअनुसार नै पेसीमाथि सुनुवाइ हुने कर्मचारीले जानकारी दिएका छन् । राष्ट्रिय सम्मेलनमा भाग लिन देशभरबाट ३ हजारजति अधिवक्ताहरु चितवन आउँदै छन् ।