चितवनमा पनि बालिकाहरु असुरक्षित

–दिपेन्द्र अधिकारी
भरतपुर । बारामा एक बालिका बलात्कारपीडित बनेपछि अहिले देशमा बलात्कार घटना चर्चाको विषय बनेको छ । बलात्कारीलाई फाँसीसम्मको सजायको माग गर्नेहरु दैनिक बढेका छन् ।
बदलिँदो सामाजिक, सांस्कृतिक, आर्थिक प्रभावले समाजमा विकृति निम्त्याएको छ । विकृतिकै कारण नेपाली दाजुभाइहरुबाटै चेलीहरु बलात्कारको शिकार बनेका छन् । बलात्कारजस्तो जघन्य अपराधलाई राज्यले चासो नदिएकोप्रति नागरिक समाजले कडा आलोचना गर्ने गरेका छन् ।
यस आर्थिक वर्षको साउनदेखि फागुन महिनासम्ममा चितवन जिल्लामा जबरजस्ती करणीका १२ वटा घटना भए । न्यायको ढोकासम्म आउन सक्नेहरुको संख्या हो यो । प्रभाव र दबाबका कारण बलात्कारजस्तो जघन्य अपराध गाउँघरमै सुटुक्क मिलाउने गरिएको घटनाहरु थुप्रै छन् ।
चितवनका जबरजस्ती करणीका कुल १२ घटनामध्येमा ५ वटा घटना बालिकासँग सम्बन्धित छ । आठ महिनाको अवधिमा प्रहरीमा परेको मुद्दाअनुसार ७ वर्ष, १६ वर्ष, १२ वर्ष, १० वर्ष र १५ वर्षका पाँच बालिका बलात्कारबाट पीडित बनेका छन् ।
अन्य पीडितहरुमा १७ देखि ५२ वर्षसम्मका महिला छन् । त्यस्तै, यसै अवधिमा बलात्कार प्रयासका ११ वटा घटनामा पाँच बालिका पीडित बनेका छन् । जसमा १६ वर्ष, ७ वर्ष, ८ वर्ष, १६ वर्ष र १३ वर्षका बालिकाहरु रहेका छन् ।
कतिपय घटनाहरुमा उच्च सामाजिक प्रतिष्ठा भएकाहरु संलग्न हुने हुँदा दबाबका कारण प्रहरीसम्म आउन नसकेको एक प्रहरी अधिकृतले बताए । बलात्कार घटनामा प्रहरीमा दिने बयान र अदालतमा दिने बयान फेरबदल हुँदा मुद्दा प्रभावित हुने गरेको पाइन्छ । कतिपय घटनाहरु अदालतमा पुग्दासम्म आर्थिक कारोबारमा मिलिसकेको हुन्छ ।
बालिका बलात्कारको घटना दिनहुँ हुन थालेपछि विभिन्न जिल्लामा विरोधका कार्यक्रमसमेत हुन थालेका छन् । यसै सिलसिलामा आइतबार एमाओवादी निकट युवा, विद्यार्थी र महिला संगठनले विरोध ¥याली निकालेका छन् ।
यसअघि गत शुक्रबार वीरेन्द्र बहुमुखी क्याम्पस नेविसंघ इकाइ समितिले पनि विरोध ¥याली निकाली यस्ता घटना हुन नदिन प्रभावकारी कानुनको माग गर्दै गृहमन्त्रीको ध्यानाकर्षण गराएका थिए ।