फेन्सी पसलमा पनि विषादी

केशव अधिकारी
धादिङ । विषादी मिसिएको गहुँको रोटी खाएर ंदक्षिणी धादिङको पिडा गाविसको पुकुन गाउँमा एकै परिवारका ६ जनाको ज्यान गएपछि जिल्ला विषादी व्यवस्थापन समन्वय समितिले सदरमुकामका पसलमा अनुगमन गरेको छ ।
अनुगमनका क्रममा सदरमुकाम धादिङबेसीमा अवैध ढंगवाट घातक विषादी बिक्री वितरण भइरहेको पाइएको छ । जिल्ला कृषि विकास कार्यालय धादिङका प्रमुख महेन्द्रराज कौडालको नेतृत्वमा सहायक प्रमुख जिल्ला अधिकारी नन्दलाल शर्मा, जिल्ला विषादी निरीक्षक माधव भट्ट, सहायक न्यायाधिवक्ता जानकीप्रसाद घिमिरे, प्रहरी सहायक निरीक्षक लक्ष्मण पाठक, कृषि प्रसार अधिकृत दुर्गाप्रसाद पन्थीलगायतको टोलीले सदरमुकामको विषादी पसल र खाद्यान्न पसलहरुमा अनुगमन गरेको हो । अनुगमनको क्रममा सदरमुकामका एग्रोभेट, खाद्यान्न, कस्मेटिक, फेन्सी, रंग पसलमासमेत विभिन्न किसिमका घातक विषादीहरु बिक्री वितरण भइरहेको पाइएको अनुगमन टोलीले जनाएको छ ।
अनुगमनका क्रममा भेटिएका अधिकांश विषादी लामखुट्टे, मुसा, झिंगालगायतका कीराहरु मार्न प्रयोग हुने गरेको सल्फरमेथ्रिन, यम्लपोरथ्रिन, जिंक फस्फाइट, ब्रोमाड्रियोलियन बेगन, मटेनरलगायतका रहेको जिल्ला कृषि विकास कार्यालयका प्रमुख कौडालले जानकारी दिए । सदरमुकाम धादिङबेसीमै  विषादीहरु खुलेआम बिक्री भइरहेको भेटिएपछि त्यस्ता विषादी जफत गरी बिक्री वितरण नगर्न सचेत गराइएको जिल्ला विषादी निरीक्षक भट्टले जानकारी दिए ।
अनुगमन टोलीले नीलकण्ठ सप्लायर्स, साझा मार्ट, कस्मेटिक सामानहरुको बिक्रि गर्ने सगुन स्टोर, विषादी विक्री गर्ने दुवाडी एग्रोभेट, रिजाल एग्रोभेटलगायतका एक दर्जन भन्दा बढी पसलहरुमा अनुगमन गरेको पनि भट्टले बताए ।
जिल्लाभर १३० भन्दा बढी विषादी बिक्री गर्ने पसलहरु रहे पनि आवश्यक मापदण्ड पूरा गरेर दर्ता भएका पसलको संख्या निकै कम रहेकाले अब त्यस्ता पसलहरुको अनुगमन गरी व्यवस्थापनकालागि कडा भएर लागि पर्ने कृषि विकास अधिकारी कौडालले बताएका छन् । उनका अनुसार विषादी बिक्री गर्नका लागि तालिम लिएको हुनुपर्ने अनिवार्य इजाजत लिनुपर्ने व्यवस्था रहेको छ ।  जिल्लाबाट उत्पादित तरकारीजन्य कृषि उपजमा अत्यधिक विषादीको मात्रा बढ्दै गएको आरोप लागिरहेको बेला पिडा गाविसका पुकुन गाउँका सन्जबहादुर तामाङले गहुँ कीराबाट जोगाउन राखेको बिषादीका कारण गहुँको रोटी खाँदा सञ्जबहादुरसहित ६ जनाको ज्यान गएको थियो । १६ जना भन्दा बढीको अहिले पनि गम्भीर अवस्थामा उपचार भइरहेको छ ।