‘जातीय राज्यले हिंसा भड्काउँछ’

भरतपुर । चितवनमा फागुन १ देखि ३ गतेसम्म सम्पन्न नेपाल क्रान्तिकारी विद्यार्थी संघको ११ औं राष्ट्रिय सम्मेलनका सहयोगीहरुलाई धन्यवाद ज्ञापन तथा सिंहावलोकन कार्यक्रम शनिबार भरतपुरमा सम्पन्न भयो ।
कार्यक्रममा नेपाल मजदुर किसान पार्टीका केन्द्रीय सदस्य सरोजराज गोसाईले देशको स्वाधीनता र नेपाली जनताको हित जोगाउन नेमकिपाले शासक दलहरुलाई खबरदारी गरिरहेको चर्चा गर्दै जनताको दैनिक जीवनमा आमूल परिवर्तन ल्याउन पूँजीवादी व्यवस्था ध्वस्त पार्नुपर्ने बताए ।
हिंसा भड्काउने हुँदा नेमकिपाले जातीय राज्यको विरोध गरिरहेको स्पष्ट पार्दै सदस्य गोसाईले संसद पुनःस्थापना गर्ने नेमकिपाको मतले सार्थकता पाएजस्तै हिमाल, पहाड र तराई जोडिएको उत्तर दक्षिणको संघीय प्रदेशले मात्र देश र जनताको हित हुने बताए ।
सैद्धान्तिक ज्ञान नै शक्तिशाली हतियार हुने चर्चा गर्दै सदस्य गोसाईले विद्यार्थी कार्यकर्ताहरुलाई नेमकिपाका प्रकाशनहरुको गम्भीरतापूर्वक अध्ययन गर्न जोड दिए ।  नेपाल क्रान्तिकारी विद्यार्थी संघको ११ औं राष्टिय सम्मेलनबाट निर्वाचित अध्यक्ष नीरज लवजूले जहाँ कठिनाइ र अवरोध त्यहाँकाम गर्न नेक्राविसंघ तत्पर रहेको बताए ।
नेक्राविसंघ चितवनका उपाध्यक्ष राजकुमार श्रेष्ठको अध्यक्षतामा सम्पन्न कार्यक्रममा नेमकिपाका केन्द्रीय सदस्य हरिसुन्दर वासी, नेमकिपा चितवनका अध्यक्ष हरिप्रसाद दुवाल, नेक्राविसंघका केन्द्रीय सदस्य प्रकाश गुरूङ, विद्यार्थीहरु भीम पाण्डे, शुभलाल चेपाङ, मेनुका थापालगायतले आआफ्नो धारणा राखेका थिए ।