मोटरसाइकल दुर्घटनामा दुईजनाको मृत्यु

रत्ननगर । पूर्वीचितवनको रत्ननगर–१७ बद्रहनीमा मोटरसाइकल दुर्घटना हुँदा दुईजनाको मृत्यु भएको छ । घटनामा परी एकजना गम्भीर घाइते भएका छन् ।
बिहीबार साँझ साढे ६ बजे तीनजना चढेको ग ९ प १२९६ नम्बरको पल्सर मोटरसाइकल अनियन्त्रित भई दुर्घटना हुँदा रत्ननगर–१७ बद्रहनीका १५ वर्षीय विवेक दराई र सोही ठाउँ निवासी १७ वर्षका अर्जुन महतोको मृत्यु भएको चितवन प्रहरीले जानकारी दिएको छ ।
घटनामा मोटरसाइकल चालक सोही ठाउँका १८ वर्षका विक्रम दराई घाइते भएका छन् । उनको गम्भीर अवस्थामा पुरानो मेडिकल कलेजमा उपचार भइरहेको प्रहरीले जनाएको छ । एक जनाको घटनास्थलमै ज्यान गएको हो भने एकजनाको अस्पताल लैजाँदै गर्दा बाटोमा ज्यान गएको चितवन प्रहरीले जनाएको छ । दुर्घटनामा परी एकै गाउँका दुई युवाको ज्यान गएपछि बद्रहनी गाउँ शोकमा डुबेको छ ।
यसैबीच, पृथ्वीराजमार्गको कुरिनटारमा शुक्रबार भएको दुर्घटनाको विषयलाई लिएर झण्डै दुई घण्टा सडक अवरुद्ध गरेका छन् । शुक्रबार साँझ ५ बजे भएको दुर्घटनापछि स्थानीयले ७ बजेसम्म राजमार्ग अवरुद्ध पारेका थिए ।
भारतीय नम्बर प्लेटको एनएल ० एलएल ६०१४ नम्बरको कन्टेनरको ठक्करबाट दारेचोक कुरिनटारका नन्दबहादुर मगर घाइते भएका छन् । उनको चितवन मेडिकल कलेजमा उपचार भइरहेको छ । दुर्घटनापश्चात् भागेको चालकसहित कन्टेनरलाई प्रहरीले नियन्त्रणमा लिएपछि राजमार्ग सञ्चालनमा आएको थियो ।