सकियो सहिद सप्ताह

भरतपुर । एमाओवादी चितवनले बिहीबार सहिद र बेपत्ता परिवारलाई सम्मान गरि सहिद सप्ताहको समापन गरेको छ ।
१० वर्षे विद्रोहमा पहिलोपटक मारिएका गोरखाका दिलबहादुर रम्तेललगायतको संझनामा फागुन १४ बाट एमाओवादीले सहिद सप्ताह मनाएको थियो  । यसपटकको सहिद सप्ताहमा पञ्चायती शासकले जेल सार्ने निहुँमा सुखानी जंगलमा मारिएका आजादसहितका पाँच जना सहिद भएको दिनको पनि एमाओवादीले संझना गरेको थियो ।
जिल्ला पार्टी कार्यालयमा आयोजित सहिद सप्ताहको समापन कार्यक्रममा बोल्दै एमाओवादी ताम्सालिङ् राज्य समितिका इन्चार्ज नारायण दाहालले विद्रोहमा मारिएका, वेपत्ता र घाइतेहरुको योगदानले देशमा आमूल परिवर्तन भएकाले उनीहरुको योगदानलाई नजरअन्दाज गर्न नमिल्ने बताए ।
विद्रोहमा मानिएकी हरिकला पौडेलका दाजु चिन्तामणि पौडेलको अध्यक्षतामा सम्पन्न कार्यक्रममा पार्टी अध्यक्ष यमबहादुर परियारले सहिद सप्ताहको बारेमा बोलेका थिए । यसैगरी सहिद सप्ताहको अन्तिम दिन बिहीबारनै एमाओवादीले चितवनका अन्य तीन ठाउँमा कार्यक्रम गरी सहिद र वेपत्ता परिवारलाई सम्मान गरेको छ । चितवन जिल्लामा १० वर्षे विद्रोहको एक सय जना भन्दा बढीले ज्यान गुमाएका छन् ।