पवित्रताको प्रतीक ‘होली’

हिन्दूहरुको महान् पर्व होली आज विशेष उत्साह र उमंगका साथ मनाइँदै छ । असत्यमाथि सत्यको विजयको प्रतीकका रुपमा मनाइने यो पर्व समाजमा एकता र सद्भावको सन्देश प्रवाह गर्न पनि सफल हुँदै आएको अनुभव गरिएको
छ । पवित्रताको प्रतीक रङ दलेर खुसीयाली मनाउने यो पर्वमा विगत केही वर्षयता विकृति पनि भित्रिने गरेको हामीले पाइरहेका छौँ । यस्तो विकृति नियन्त्रण गर्न सामाजिक अगुवा र स्थानीय प्रहरी प्रशासनले विशेष भूमिका खेल्नुपर्ने आवश्यकता टड्कारो रुपमा महसुस गरिएको छ । होली आयो भनेर खुसी मान्नुभन्दा पनि होलीमा हुने गरेको हुलदंगा र जबर्जस्ती रङको प्रयोगले समाजमा एक प्रकारको आतंक फिँजाउने गरेको छ ।
सभ्य नागरिक भएपछि हाम्रा सामाजिक कार्य र व्यवहारहरु पनि सभ्य हुनुपर्दछ । चाडपर्वको ऐतिहासिक मह¤व र गरिमालाई सम्झेर हामीले आजको होली मनाउन सक्नु परेको छ । जबर्जस्ती रङ दल्ने र लोला हान्ने तथा रङमा घातक विषादी प्रयोग गरेर मानव स्वास्थ्यमा खेलबाड गर्नेजस्तो असभ्य काम कसैले पनि गर्नुहुँदैन । अराजक गतिविधि गर्नेलाई प्रहरीले पक्राउ गरी कानुनी कारबाही गर्नु अत्यावश्यक देखिएको छ ।
चाडपर्वहरु सुखद सन्देश लिएर आउने गर्दछन् । हामीले तिनको परम्परागत मह¤वलाई आत्मसात् गर्दै मनाउनुपर्दछ । खासगरी, होलीमा उच्छृंखल र अराजक गतिविधि गर्नेहरुले यसको धार्मिक मह¤वलाई नै ओझेलमा पार्ने काम गरिरहेका छन् । हामीले त्यस्तो प्रवृत्तिविरूद्ध सामाजिक सचेतना बढाउनु आवश्यक देखिएको छ । यस वर्ष त्यस्तो अप्रिय घटना घट्न नपाओस् भनेर जनस्तरबाट पनि पहल गरिनुपर्दछ ।
छिमेकी राष्ट्र भारतका हिन्दू धर्मावलम्बीहरुले पनि होली पर्व विशेष उत्साहपूर्वक मनाउने गर्दछन् । त्यहाँ विभिन्न सहरमा अराजक गतिविधि पनि बर्षेनि भइरहेका छन् । त्यहाँको विकृत संस्कृति नेपालमा पनि भित्रिएका कारण हाम्रा युवाहरु पनि होली पर्वलाई विकृत बनाउन उद्यत भएको हामी पाउँछौँ । राज्यले यस्ता अराजक गतिविधिविरूद्ध सशक्त गतिविधि सञ्चालन गर्नु आवश्यक देखिएको छ । युवापिँढीमा बढी मात्रामा देखिने विकृतिले समाज नै आतंकित हुने गरेको छ । शान्तिको विरूद्ध देखिने यस्ता नकारात्मक क्रियाकलाप यो वर्ष देख्न नपरोस् भनेर स्थानीय प्रशासनले कडा कदम चाल्नु आवश्यक देखिएको छ ।