खाद्यान्नमा विषादी बढ्नुमा उपभोक्ता दोषी

नारायणगढ । उपभोक्ता अधिकार हित संरक्षण मञ्च र वाली संरक्षण निर्देशनालय हरिहर भवनले संयुक्त रुपमा गरेको अन्तक्र्रिया कार्यक्रमका बक्ताहरुले उपभोक्ता सचेत नहुदा नै खाद्यान्न तथा तरकारीमा विषादीको प्रयोग बढेको बताएका छन् ।
बुधबार भएको अन्तक्र्रियामा उनीहरुले तरकारी तथा अन्न वाली लगाउँदा देखिकै विषादी प्रयोगमा नियन्त्रण गर्नुपर्नेमा जोड दिए ।
‘अहिले विषादी वढी प्रयोग भएका खाद्यान्न र तरकारीहरु जथाभावी प्रयोगमा आइ रहेका छन्’, निर्देशनालयका महानिर्देशक डिल्लीराम शर्माले भने, ‘नेपालमा प्रतिबन्धित विषादीहरुको समेत प्रयोग वढ्दो छ । पहिला त्यस्ता प्रतिबन्धित विषादीहरुको प्रयोगमा रोक लगाउन जरुरी छ ।’उपभोक्ताहरु सचेत नभएसम्म वढ्दो विषादीको प्रयोगमा कमी ल्याउन नसकिने उनको भनाइ छ ।
कार्यक्रममा बोल्दै उपभोक्ता हित अभियन्ता ज्योति बानियाले प्रतिबन्धित विषादीको प्रयोग वढी भएकाले त्यसको नियन्त्रणमा चितवनले सकारात्मक भूमिका खेल्नुपर्ने बताए । ‘विषादीकै कारण क्यान्सर लगायतका डरलाग्दा रोगको संक्रमणमा पर्नुपर्ने वाध्यता हामीमा छ’ उनले भने, ‘विषादी प्रयोग नियन्त्रणका लागि विशेष अभियान चलाउनुपर्ने आवश्यकता छ ।
नेपालमा क्लोरडेन,डीडीटी, डाइलल्ट्रिन, इन्ड्रिन, अल्ड्रिनलगायतका १५ प्रकारका विषादीहरु प्रयोगमा रोक लगाइए पनि यसको सहजै प्रयोगमा आइरहेका उनको भनाइ छ ।
‘विषादीको नकारात्मक असरवाट बच्न र अरुलाई बचाउन पनि यसको प्रयोगमा निषेध गर्न जरुरी छ’, उनले भने ।
उपभोक्ता हित संरक्षण मञ्च चितवनका अध्यक्ष श्रीप्रसाद दवाडीको अध्यक्षतामा सम्पन्न कार्यक्रममा झण्डै सय भन्दा वढी सरोकारवाला निकायको सहभागिता रहेको थियो ।