भरतपुर । नेपालमा महिला प्रताडित हुने कुरीतिहरु ५७ खालका रहेको यस क्षेत्रमा कार्यरत अगुवाहरुले बताएका छन् । कुरीति अन्त्य समाज नामक संस्थाको दुई दिने भेला समापनमा शनिबार संस्थाकी अध्यक्ष विमला पराजुलीले ५७ खालका कुरीतिबाट महिलाहरु प्रताडित हुनुपरेको बताइन् ।
‘त्यसमध्ये दाइजो प्रथा, बोक्सी, कमलहरी, छाउपडी, देउकी, बालविवाहले महिलाहरुलाई विकराल अवस्थामा पु¥याएको छ । हामी यस्ता कुरीतिका विरूद्ध क्रियाशील छौँ’ अध्यक्ष पराजुलीले भनिन् । छोरीलाई कन्यादान गर्नु पनि कुरीति नै भएको उनले बताइन् ।
आफ्नो संस्थाले गत वर्षको साउनदेखि तराईका २२ जिल्लामा कुरीति सम्वन्धी हिंसा अन्त्य सञ्जालको नामबाट काम गर्दै आएको उनले बताइन् । यही कात्तिकबाट भने संस्था कुरीति अन्त्य समाजको नामबाट काठमाडौंमा दर्ता भएको उनले जानकारी दिइन् ।
‘परम्पराको नाममा पनि महिलामाथि ज्यादतीहरु भएका छन् । कुमारीका नाममा बालबालिकाको बालअधिकार हनन हुने घटनाहरु भएका छन् । तीजमा पतिको आयु बढाउन भनेर महिलाहरुलाई ब्रत बस्न लगाइन्छ’ अध्यक्ष पराजुलीले भनिन्,
‘यो पनि अर्को कुरीति हो ।’ सामान्य लाग्ने संस्कारले महिलामाथि अत्याचार गरेको उनले बताइन् । यस्ता खालका संस्कारलाई हटाउन अभियान चलाउने उनको भनाइ छ । संस्था हाल २३ जिल्लामा विस्तार भएको र पाँच विकास क्षेत्रमै पुगेको उनले जानकारी दिइन् ।
‘छोरा नजन्मेमा पनि महिलालाई यातना, दाइजो नल्याए पनि महिलालाई यातना । महिलाले अरु पुरूषको अनुहारसमेत हेर्न हुन्न भनेर घुम्टोमा राख्ने परम्परा छ । यस्ता परम्परालाई हामीले निर्मुल गर्न आवश्यक छ’ अध्यक्ष पराजुलीले भनिन् ।
धर्म, संस्कृति र परम्पराका आडमा हुने सबै खालका महिला हिंसाविरूद्ध आफूहरु लाग्ने उनले बताइन् । संस्थालाई विस्तार गर्ने सोचले भरतपुरमा राखेको भेलामा २३ जिल्लाका ९० जनाले भाग लिएको उनले जानकारी दिइन् ।
‘सबै जिल्लाको कार्य योजना पनि भेलाबाट तयार बनाएका छौं । अब जिल्ला जिल्लामा महिला हिंसाको यथार्थ विवरण तयार पारिने छ । त्यस्ता घटनामा संलग्नहरुलाई कानुनी कारबाही गराइने वातावरण बनाइनेछ’ पराजुलीले भनिन् ।
बोक्सीप्रथा नियन्त्रणका लागि परिमार्जनसहित संसदमा गएको विधेयक तुरुन्त पारित गर्न उनले माग गरिन् । त्यस्तै, छाउपडी रोक्न बनेको ऐन पूर्ण कार्यान्वयन गर्न पनि उनले आग्रह गरेकी छन् । यसका लागि संस्थाले दबाबमुखी अभियान पनि चलाउने उनले बताइन् ।
संस्थामा पीडितहरुको नै नेतृत्व रहेको उनले बताइन् । ‘हाम्रो संस्थाको केन्द्रमा होस् वा जिल्लामा होस् नेतृत्वमा रहनेहरु सबै कुनै न कुनै कुरीतिको शिकार भएका पीडितहरु बताउँछन् । समस्या भोगेकाले नै आन्दोलन हाँकेका छन्’ अध्यक्ष पराजुलीले भनिन् ।
Discussion about this post