रनिङ शिल्डको उपाधि जानकीलाई

भरतपुर । जिल्लास्तरीय राष्ट्रपति रनिङ शिल्ड खेलकुद प्रतियोगिताको बुधबार सम्पन्न फाइनल खेलहरुमा कुल १५१ अंकका साथ मेघौलीको जानकी उच्च माध्यमिक विद्यालयले विजय हासिल गरेको छ । प्रतियोगितामा दुर्गा शेषकान्त उमावि विजयनगर दोस्रो र प्रेमबस्ती उच्च मावि तेस्रो भए ।
प्रतियोगिताअन्तर्गत बुधबार छात्र र छात्राहरुबीच विभिन्न ८ विधाका खेलहरु सम्पन्न भएका थिए । पाँच हजार मिटर दौड छात्रतर्फ दुर्गा शेषकान्त उमाविका नरेश तामाङ र पाँच हजार मिटरकै छात्रातर्फ प्रेमबस्ती उमाविकी समीक्षा पोख्रेल पहिलो भएका छन् ।
ज्याभलिङ थ्रो छात्रतर्फ दुर्गा शेषकान्त उमाविका वीरेन्द्र चौधरी र छात्रातर्फ लक्ष्मी उमावि लंकूकी देवी मल्ल प्रथम भए । आठ सय मिटर दौडमा छात्रतर्फ दुर्गा शेषकान्त उमाविका नरेश तामाङ् र छात्रातर्फ जानकी उमाविकी भावना महतो पहिलो भएका थिए  ।
हाइजम्पको छात्रतर्फ माध्यमिक विद्यालय गवैका रामनाथ चौधरी  र छात्रातर्फ जानकी उमाविकी संगम महतोले प्रथम स्थान हासिल गरे । भलिबल खेलको छात्रतर्फ भीमनगर उमावि तथा छात्रातर्फ जानकी उमावि पहिलो हुन सफल भए ।
ट्रिपल जम्प छात्रतर्फ जानकी उमाविका भुवन महतो पहिलो भए भने ट्रिपल जम्पकै छात्रातर्फ माध्यमिक विद्यालय गवैकी रेजिना राउत पहिलो भइन् ।
त्यसैगरी, दुई सय मिटर दौड छात्रतर्फ वीरेन्द्र आदर्श माविका विज्ञान चौधरी पहिलो र छात्रातर्फ जानकी उमाविकी सञ्जु कुमाल पहिलो भइन् । चार सय मिटर रिलेको छात्रतर्फ दुर्गा शेषकान्त उमावि प्रथम तथा छात्रातर्फ जानकी उमावि प्रथम भएको छ । प्रतियोगितामा विजयी छात्रछात्राहरुलाई प्रमाणपत्र तथा शिल्डसहित सम्मान गरिएको थियो ।