द्वन्द्वपीडितको तथ्यांक पुनः संकलन हुने

भरतपुर । सरकारले भर्खरैमात्र सत्य निरूपण तथा मेलमिलाप गठन गरेलगत्तै स्थानीय शान्ति समिति चितवनले द्वन्द्वका समयमा पीडित बनेका व्यक्तिहरुको पुनःलागत संकलनको काम सुरू गर्ने भएको छ ।
समितिले सोमबार भरतपुरमा आयोजना गरेको गाउँ तथा नगरस्तरीय शान्ति समितिका पदाधिकारीहरुलाई अभिमुखीकरण कार्यक्रममा फागुन ११ गतेभित्र लागत संकलन गरी कार्यालयमा बुझाउन गाउँस्तरका शान्ति समितिलाई आग्रह गरेको छ । चितवनमा यसअघि एक हजार १४७ वटा द्वन्द्वपीडितको निवेदन परेकोमा ५ सयजनाले राहत बुझेको स्थानीय शान्ति समिति चितवनले जनाएको छ ।
शान्ति समितिको तथ्याङ्कअनुसार द्वन्द्वका समयमा ३८ जना बेपत्ता, ९७६ जना घाइते तथा अपाङ्ग, ९३ जना अपहरण र ११९ जना बालबालिका टुहुरा भएका छन् । तथ्याङ्क अझै अपुरो रहेकाले वास्तविक तथ्याङ्क संकलनका लागि अहिले दोस्रो चरणमा काम सुरू गर्न लागिएको द्वन्द्व प्रभावित व्यक्ति, परिवारको हकमा नेपाल सरकार शान्ति तथा पुनर्निर्माण मन्त्रालयद्वारा गठित कार्यदलका प्रवक्ता रामचन्द्र घिमिरेले बताए ।
सरकारले यस विषयमा वास्तविकता बाहिर ल्याउनका लागि आयोग बनाइ सकेकाले द्वन्द्वपीडितलाई राहत दिनका लागि अब कुनै समस्या नआउने उनको विचार थियो । चितवनका प्रमुख जिल्ला अधिकारी डा. मानबहादुर विके प्रमुख अतिथि रहेको कार्यक्रममा वक्ताहरुले द्वन्द्वपीडितको वास्तविकता नबुझी सरकारले राहतको कोटा निर्धारण गर्दा समस्या आएको बताए ।
शान्ति समितिका निमित्त संयोजक जीतनारायण श्रेष्ठको अध्यक्षतामा सम्पन्न कार्यक्रममा गाविस सचिव हकहीत संरक्षण मञ्चका प्रद्युम्न खड्का, साविकको पटिहानी शान्ति समितिका संयोजक हरिकृष्ण सुवेदी, माडीका कारी महतो, शान्ति समितिका सदस्य बद्री तिमल्सिना, निशा न्यौपाने, मुकुन्द दहाललगायतले बोलेका थिए ।