पुलिस, सशस्त्र र आर्मी सेमिफाइनलमा

भरतपुर । पटिहानीमा जारी पद्मोदय राष्ट्रिय पुरूष भलिबल प्रतियोगितामा उत्कृष्ट प्रदर्शन जारी राख्दै तीनवटा विभागीय टिम सेमिफाइनलमा पुगेका छन् ।
पहिलो दिन दोहोरो जित निकालेका नेपाल प्रहरी र सशस्त्र प्रहरी तथा एक जीत र एक हार निकालेको नेपाल आर्मी भलिबल टिमले मंगलबार थप खेल जित्दै अन्तिम चारमा पुगेका हुन् । सेमिफाइनल पुग्ने अन्तिम टिम भने टुंगो लागेको छैन ।
अघिल्लो दिन दुई जीत निकालेको सशस्त्र प्रहरी बल एपीएफले समूह चरणको अन्तिम खेलमा पूर्वाञ्चल भलिबल टिमलाई २५–१९, २५–१७ र २५–१६ को सोझो सेटमा पराजित ग¥यो । त्यस्तै, अघिल्लो दिन दुबै खेल जितेको नेपाल प्रहरीले मंगलबार सुदूरपश्चिमविरूद्ध २५–११, २५–१८ र २५–१० मा सजिलो जीत दर्ता ग¥यो । नेपाल प्रहरी समूह ‘ए’ तथा एपीएफ समूह ‘बी’ को विजेता बनेको छ ।
त्यस्तै, समूह ‘बी’ बाटै समूह दोस्रो बन्दै अर्को विभागीय टिम नेपाल आर्मी सेमिफाइनल प्रवेश गरेको छ । आयोजक पद्मोदय युवा क्लबविरूद्ध २५–१६, २५–१९ र २५–१५ को नतिजा निकालेपछि आर्मी अन्तिम चारमा प्रवेश गरेको हो । आर्मीले अब फाइनल प्रवेशका लागि समूह ‘ए’ विजेता नेपाल प्रहरीसँग प्रतिस्पर्धा गर्नेछ ।
मंगलबार भएको अर्को प्रतिस्पर्धात्मक खेलमा जावलाखेलविरूद्ध उत्कृष्ट जीत दर्ता गर्दै पश्चिमाञ्चल भलिबल क्लबले अन्तिम चार पुग्ने समीकरण रोमाञ्चक बनाएको छ । अघिल्लो दिन एक खेल एक हारको नतिजा निकालेको जावलाखेल समूह चरणको अन्तिम खेलमा पश्चिमाञ्चलसँग हार व्यहोर्न बाध्य भयो । कडा प्रतिस्पर्धा भएको खेलमा पश्चिमाञ्चलले जावलाखेललाई १८–२५, २५–१०, २५–२२, २३–२५ र १५–६ को सेटमा पराजित ग¥यो । यसअघि जावलाखेलले सुदूरपश्चिमाञ्चललाई २५–१५, २५–१९ र २५–१६ को सेटमा पराजित गरेको थियो ।
अब बाँकी खेलमा पश्चिमाञ्चलले सुदूरपश्चिमाञ्चललाई पराजित गरे जावलाखेल बाहिरिने छ भने पश्चिमाञ्चल समूह उपविजेताका रुपमा सेमिफाइलन प्रवेश गर्दै सशस्त्र प्रहरीसँगको भीडन्त पक्का गर्नेछ । बाँकी खेल बुधबार हुनेछ । पद्मोदय युवा क्लबको आयोजनामा जारी प्रतियोगिताका विजेताले १ लाख ५० हजार, दोस्रोले १ लाख, तेस्रोले ५० हजार र चौथो हुने टिमले २५ हजार रूपैयाँ पुरस्कार पाउनेछन् ।