आवश्यक अनुसन्धान गर्न जरूरी
बेलायतको एचएसबीसी बैंकको स्वीट्जरल्यान्ड शाखामा नेपालीको नाममा ५४ मिलियन अमेरिकी डलर अर्थात् पाँच अर्ब ४० करोड रूपैयाँ रहेको खुलासा भएको छ । नेपालमा कर छलेर, भ्रष्टाचारजन्य गतिविधि तथा आपराधिक क्रियाकलापबाट आर्जित रकम स्वीस बैंकमा लुकाइएको हुनसक्ने खोज पत्रकारहरुको अन्तर्राष्ट्रिय संस्था आइसीआइजेले विश्वका सञ्चारमाध्यमहरुको साझेदारीमा सार्वजनिक गरेको हो । आइसीआइजेको प्रतिवेदनमा एक मिलियनभन्दा कम खातावालको विवरण समेटिएको छैन । संस्थाले सार्वजनिक गरेको विवरणअनुसार आठ नेपालीका ३६ खातामा उक्त कालो धन रहेको पाइएको हो । नेपाल धेरै
रकम राख्ने मुलुुकको सूचीमा ११६औँ स्थानमा रहेको छ ।
विश्वभरका राजनीतिक नेता, कर्मचारी, व्यापारी तथा अपराधीहरुको अनाधिकृत रकम जम्मा हुने स्वीस बैंकमा नेपाली पनि सामेल भएका हुन् । विश्वका प्रतिष्ठित मिडियाहरुमा सार्वजनिक गरिएको नामावलीमा नेपालका तर्फबाट कसले रकम जम्मा गरेको हो, त्यो भने खुलाइएको छैन । नेपालीले सन् १९९४ देखि २००७ सम्ममा ती खाता खोलिएको भेटिएको छ । ती खाताबाट कारोबार भइरहेको देखिए पनि नेपाल राष्ट्र बैंक बेखबरजस्तै बनेको छ । यसअघि पनि सन् २०१३ मा नेपालका तर्फबाट १३ जनाको नाम सार्वजनिक भएको थियो । आइसीआइजेको पछिल्लो खुलासाले नेपालसहित विभिन्न मुलुकलाई गैरकानुनी सम्पत्ति अनुसन्धान गर्न बाटो खोलिदिएको छ । नेपालमा विदेशमा रहेको कालो धनमाथि अनुसन्धान गर्न कानुनी संरचना बनिसकेको स्थितिमा राष्ट्र बैंकले गम्भीरतापूर्वक अनुसन्धान प्रक्रिया अघि बढाउनु आवश्यक देखिएको छ ।
राष्ट्र बैंकको पछिल्लो तथ्यांकअनुसार विदेशमा पसिना बगाएर पठाएको रेमिट्यान्ससहित प्रतिव्यक्ति नेपालीको आय करिब २ हजार ३१० डलर पुगेको छ । हातमुख जोर्नका लागि अधिकांश नेपाली ज्याला मजदुरी गर्न बाध्य छन् । देशको अर्थतन्त्र धराशायी बनिरहेको छ, बेरोजगार जनता दिनहुँ थपिएका छन् । मुलुक राजनीतिक अस्थिरता र संक्रमणको कुचक्रबाट मुक्त हुन सकेको छैन । अधिकांश नेपालीहरु गरिबी र बेरोजगारी समस्याबाट आक्रान्त भइरहेको अवस्थामा विश्वभरका राजनेता एवम् अपराधीहरुसँगै नेपालीको कालो धन स्वीस बैंकमा थुपारिनु दुर्भाग्य हो । केही वर्षअघिदेखि नै नेपाली नेता तथा कर्मचारीका नाममा समेत स्वीस बैंकमा खाता रहेको सुनिँदै आएको थियो । सरकारले स्वीस बैंकमा पत्राचार गरी आवश्यक अनुसन्धान गर्नु जरूरी देखिएको छ ।
Discussion about this post