एन्जिलिना र अस्मिताले जिते डान्स चितवन डान्सको उपाधि

भरतपुर । सोसिजेनस मिडिया प्रालिको रियालिटी शो ‘डान्स चितवन डान्स’को फाइनल विविध सांगीतिक प्रस्तुतिका साथ सोमबार सकिएको छ ।
फाइनलमा १४ वर्षभन्दा मुनिको प्रतियोगीहरुमा पाँचजनालाई पछि पार्दै पहिलो भएकी एन्जिलिना बरालीले एक लाख रूपैयाँसहित सम्मानपत्र प्राप्त गरेकी छन् । त्यसैगरी अनन्ता पन्त दोस्रो, जीया जोशी र रीतिका श्रेष्ठको जोडी तेस्रो भएको छ । दोस्रो र तेस्रो हुनेले शिल्ड र सम्मानपत्र प्राप्त
गरेका छन् ।
१४ वर्षभन्दा माथिको अन्तिम प्रतियोगीहरुमा भउनपा–२ क्षेत्रपुरकी अस्मिता सेन्चुरी पहिलो भई एक लाल रूपैयाँ र सम्मानपत्र प्राप्त गरेकी छन् । राजकुमार विक र गोविन्द विकको जोडी दोस्रो र सुनिल विकले तेस्रो स्थान हासिल गरेका छन् ।
कार्यक्रममा राष्ट्रिय कलाकारहरु रामकृष्ण ढकाल, जितु नेपाल, रवि डंगोल, पूर्ण थापा र स्थानीय कलाकारहरु भूवन प्यासी, उपेन्द्र गोरखाली, नेपाली ताराको टप पाँचमा पर्न सफल टाँडीका सुरेश लामाले प्रस्तुति दिएका थिए । राष्ट्रिय खेलाडी सूर्यकुमार श्रेष्ठ, चलचित्र पत्रकार संघ चितवनका अध्यक्ष रवि अधिकारीलाई कार्यक्रममा सम्मान गरिएको थियो ।
औपचारिक कार्यक्रममा प्रमुख अतिथि चितवनका प्रमुख जिल्ला अधिकारी डा. मानबाहादुर विकेले यस्ता कार्यक्रमले समाजमा कलासंस्कृतिको जगेर्ना अहम् भूमिका खेल्ने र सरकारले यस्ता किसिमका प्रतियोगिता गरेर कला तथा संस्कृतिको जगेर्ना गर्नुपर्ने बताए । सीमा सुरक्षा बलका एसएसपी शम्भु उप्रेती विशिष्ट अतिथि रहेको कार्यक्रमको सभापति प्रालिका प्रवन्ध निर्देशक मिलन गोले रहेका थिए ।