अन्तर्राष्ट्रिय न्यूरो सर्जिकल सम्मेलन हुने

भरतपुर । चितवनको भरतपुरमा रहेको कलेज अफ मेडिकल साइन्सेस शिक्षण अस्पतालमा माघ २७ गतेदेखि २९ गतेसम्म अन्तर्राष्ट्रिय न्यूरो सर्जिकल सम्मेलन हुने भएको छ ।
कलेज अफ मेडिकल साइन्सेस् शिक्षण अस्पताल भरतपुर न्यूरो सर्जरी विभाग, एसियन कांग्रेस अफ न्यूरोलोजिकल सर्जरी, नेपलीज सोसाइटी अफ न्यूरो सर्जन्स् र वाल्टरडेण्डी सोसाइटीको संयुक्त आयोजनामा सम्मेलन गर्न लागिएको हो । न्यूरो सर्जिकल कन्फरेन्समा विश्वमा ४० भन्दा बढी नाम चलेका संकायहरुको सहभागिता रहनेछ ।
सम्मेलनमा २ सयजना विज्ञहरुको सहभागिता रहने कलेज अफ मेडिकल साइन्सेस् शिक्षण अस्पतालका आवासीय निर्देशक डा. भी. नटराजप्रसादले जानकारी दिए । एसियन कांगे्रस अफ न्यूरोलोजिकल सर्जरीका प्रेसिडेण्ट यूको काटो र वाल्टरडेण्डी सोसाइटीका सलिम अव्दुल रफ, न्यूरो ट्रमा सर्जरी सम्बन्धी अन्वेषक मेडिकल कलेजका प्रोआईपी चेरियन युरोप, अमेरिका, अफ्रिका, अष्ट्रेलिया, क्यानडा, विभिन्न एसियाली देश र नेपालका ख्याती प्राप्त न्यूरो सर्जन्स्सहित विश्वभरका न्यूरो विशेषज्ञहरुको सहभागिता रहनेछ ।
सम्मेलनमा टाउको र नशा रोगमा विश्वमा भएका नयाँ प्रयोग तथा उपचारमा भित्रिएका प्रविधिको विषयमा विशेष अनुभव आदानप्रदान हुनेछ ।
त्यसैगरी न्यूरो सर्जरीमा नेपालमा मात्रै नभई विश्वका विभिन्न मुलुकको नेतृत्व गरिरहेको कलेज अफ मेडिकल साइन्सेस् शिक्षण अस्पतालमा हुने यस सम्मेलन नेपालको शान बन्ने न्यूरो विशेषज्ञ डा आइपी चेरियनले विश्वास व्यक्त गरे ।