चितवनको गाउँगाउँमा कुष्ठरोगीको खोजी

रत्ननगर । चितवनको पहाडी गाविसमा अहिलेसम्म कुष्ठरोगी फेला नपरेकाले अवस्थाको अध्ययन गर्न गाउँगाउँमा कुष्ठरोगीको खोजी अभियान सञ्चालन गरिने भएको छ ।
जिल्ला जनस्वास्थ्य कार्यालय चितवनले कुष्ठरोगी खोजी अभियानका लागि प्रक्रिया सुरू गरेको र फागुन महिनाबाट कार्यक्रम सञ्चालन गर्ने जनाएको छ ।
यसअघि चितवनका पहाडी गाउँमा कुष्ठरोगी नभेटिएकाले वास्तविकता हो या उपचारको पहुँचमा बिरामी आइनपुगेका हुन् भनेर अध्ययन हुने जनस्वास्थ्य कार्यालयको कुष्ठ तथा क्षयरोग अधिकृत जयराम दवाडीले जानकारी दिए ।
उनका अनुसार चितवनको दाहखानी र लोथर गाविसमा उक्त अभियान सञ्चालन हुनेछ । शिविर सञ्चालन गरेर रोगीको अवस्थाबारे बुझ्ने र सचेतनामूलक कार्यक्रम सञ्चालन गरिने उनले बताए ।
जिल्ला जनस्वास्थ्य कार्यालयले गएको एक वर्षमा गरेको अध्ययनमा भरतपुर उपमहानगरपालिकामा मात्रै २२ जना कुष्ठरोगका बिरामी फेला परेको अधिकृत दवाडीले जानकारी दिए ।
जिल्लाका ६ नगरपालिका र ६ वटा गाविसमा मात्रै कुष्ठरोगका बिरामी फेला परेको तथ्याङ्क छ । चितवन नगरपालिकामा ९, नारायणीमा ४, माडीमा ६, खैरहनीमा २ र रत्ननगरमा ६ जना बिरामी भेटिएको कार्यालयले जनाएको छ ।
यता भण्डारा गाविसमा ३, पिप्लेमा १, कठारमा १, वीरेन्द्रनगरमा २, जुटपानी र दिव्यनगरमा २ जना गरी ९ जना बिरामी गाविसमा फेला परेका छन् । अन्य गाविसमा अहिलेसम्म फेला परेको छैन ।
उनका अनुसार जिल्लामा कुल ५६ जना कुष्ठरोगीमध्ये २२ जना भरतपुरमा र अन्य नगरपालिकामा २५ जना तथा ६ वटा गाविसमा ९ जना बिरामी छन् ।
चितवनमा गएको एक वर्षमा ६७ जना र त्यसको अघिल्लो वर्ष १०५ जना कुष्ठरोगीको उपचार भएको थियो ।
उक्त रोग सर्ने र नसर्ने दुई प्रकारका हुने र यो रोग छ महिना र १२ महिनासम्म नियमित औषधि सेवन गर्दा निको हुने चिकित्सकले बताएका छन् । रासस