‘ज्यूँदो माछा ओसारपसारमा प्रहरीबाटै हैरानी’

भरतपुर । पसलमा पाइने ज्यूँदो माछाले नेपालीलाई माछा किनेर खान आकर्षित ग¥यो । चितवन, पोखरा, काठमाडौं जताततै अहिले धमाधम ज्यूँदो माछा पसल खुल्न थालेका छन् । तर ज्यूँदो माछा ढुवानी गर्दा प्रहरीले हैरान पार्ने व्यवसायीको दुःखेसो छ ।
माछा काठमाडौं लैजाँदा नागढुंगा नाकामा प्रहरीले दुःख दिने गरेको चितवनका मत्स्य व्यवसायीहरुले जानकारी दिएका छन् । चेक पोष्टमा प्रहरीले माछा वा नगद माग गर्ने व्यवसायीको गुनासो छ । मागेको रकम र माछा नदिए अनेक बाहानामा दुःख दिने नेपाल मत्स्य व्यवसायी संघका केन्द्रीय महासचिव अम्बिकाप्रसाद अधिकारीले बताए ।
‘प्रहरीले नाकामा दिने हैरानीका विषयमा प्रहरी प्रधान कार्यालयमा सोमबार जानकारी पत्र समेत पठाएका छौं’, महासचिव अधिकारीले भने । प्रहरी प्रधान कार्यालयलाई पठाएको पत्रमा चेक पोष्टमा अनावश्यक विवाद परी आर्थिक लाभसमेत लिने गरेको उल्लेख छ । सो पत्रको बोधार्थ कृषि मन्त्रालय, मत्स्य विकास निर्देशनालयलगायतका छवटा सरकारी निकायमा पनि पठाइएको छ ।
नेपालमा भारतीय माछाको खपत निकै छ । भारतबाट आउने माछा नकुहियोस् भन्नका लागि फर्मालिनजस्तो मानव स्वास्थ्यलाई असर गर्ने खतरनाक रसायन राख्ने प्रमाणित हुने गरेको छ । केही समययता नेपालमा पनि माछा उत्पादन बढ्न थालेको छ । नेपाली माछा ज्यूँदै उपभोक्तासम्म पु¥याउने प्रयास व्यवसायीहरुले गर्दै आएका छन् ।
‘यसरी ज्यूँदो माछा बोकेर जाने गाडीहरु रोकेर पैसा र माछा माग्ने गरिन्छ’, महासचिव अधिकारीले भने । चितवनबाट नागढुंगा हुँदै र बारा, पर्साबाट फर्पिङ हुँदै ज्यूँदो माछा काठमाडौं जाने गरेको छ । ‘दुवै ठाउँमा दुःख दिने गरेको व्यवसायीहरुको गुनासो आउने गरेको छ’, महासचिव अधिकारीले भने ।
उनको माछा आइतबारमात्रै काठमाडौं जाँदा प्रहरीले दुःख दिएको थियो । बिहान आठ बजे एक क्विटल ८७ केजी ज्यूँदो माछा बोकेको ना २ च ४४४७ नम्बरको बलेरो पिकअपबाट प्रहरीले पहिला पैसा मागेका थिए । ‘पिकअपमा रहेका मेरो साथीले पैसा दिन नमानेपछि बिलबुक खोसेर लगेछ’, अधिकारीले भने ।
‘धेरै विवाद भएपछि अन्तिममा पाँच सय रुपैयाँ जरिवाना काटेरमात्रै गाडी छाडेछन्’, अधिकारीले भने । माछा पशुसेवा कार्यालयले प्रमाणित गरेको हुनु पर्छ । चितवन जिल्ला पशुसेवा कार्यालयका पशु चिकित्सक डा.टीकाराम न्यौपानेले माछा स्वास्थ्यकर भनेर प्रमाणित गरेको कागजपत्र पनि साथमै थियो ।
‘सबै कागजपत्र देखेपछि अन्तिममा दुःख दिने नियतले ओभरलोड भनेर जरिवाना काटेछन्’, महासचिव अधिकारीले भने । मत्स्य व्यवसायीहरु आउँदो पाँच वर्षभित्र नेपाललाई माछामा आत्मनिर्भर बनाउने उद्देश्यले अभियान चलाइरहेको अधिकारी बताउँछन् । ज्यूँदो माछा उपभोक्तालाई आकर्षित गर्न निकै प्रभावकारी भएको उनले बताए ।
‘प्रोत्साहनको साटो प्रहरीले दुःख हैरानी दिने कार्य ज्यादै नै निन्दनीय छ । यस्तो घटनाको तुरुन्त छानविन होस् । दोषीलाई कारबाही होस्’, मत्स्य व्यवसायी संघले प्रहरी प्रधान कार्यालयमा पठाएको पत्रमा उल्लेख छ । केन्द्रीय महासचिव अधिकारीका अनुसार अहिले दैनिक पाँच गाडी ज्यूँदो माछा काठमाडौं जाने गर्छ । माग बढी हुने समयमा यो दोब्बर हुन्छ ।