गैँडाकोट । उपप्रधान तथा स्थानीय विकास एवम् संघीय मामिलामन्त्री प्रकाशमान सिंहले दोस्रो संविधानसभाले माघ ८ गते लिखित गणतन्त्रात्मक संविधान जारी गररै छाड्ने बताएका छन् ।
बीपी कोइरालाको शतवार्षिकी तथा ३२ सौं स्मृति दिवसको अवसरमा नेपाली काँग्रेस गँैडाकोट नगर समितिले आयोजना गरेको एक हप्ते कार्यक्रमको आइतबार गैँडाकोटमा समापन गर्दै सिंहले सो कुरा बताएका हुन् ।
उनले संविधान लेखनका कारण पनि काँग्रेस र एमालेको गठबन्धन आवश्यक भएको तर्फ स्पष्ट पार्दै पहिलो संविधानसभामा काँग्रेस पछि परेकै कारण संविधान नबनेकाले दोस्रो संविधानसभामा काँग्रेस पहिलो दल बन्न सफल भएको बताए । उनले माघ ८ गते मुलुकले लिखित संविधान पाउने दावी गरे ।
मन्त्री सिंहले राजनीतिक अस्थिरताका कारण विकास निर्माण प्रभावित भएकोले स्थायित्व र स्थिरताका लागि पनि संविधान आवश्यक भएकाले यो सरकारले संविधान जारी गरी मुलुकको विकासमा अघि बढ्ने भनाइ राखे ।
नगर सभापति तारापति खरेलको सभापतित्वमा कार्यक्रम भएको थियो ।
Discussion about this post