भरतपुर । नेकपा एमाले चितवनले हालै आएको बाढी पहिरो पीडितका लागि राहत संकलन गर्ने निर्णय गरेको छ । पार्टीको आइतबार बसेको बैठकले राहत संकलन कार्यलाई तीव्रता दिने निर्णय गरेको हो ।
जिल्ला अध्यक्ष जगन्नाथ थपलियाको अध्यक्षतामा बसेको बैठकले चितवनसहित देशभर बाढी पहिरोका कारण भएको जनधनको क्षतिप्रति दुःख व्यक्त गर्दै विस्थापित परिवारहरुलाई राहत र तत्काल उचित व्यवस्थापनका लागि सरकारसँग माग गरेको छ । बैठकले राहत संकलनका लागि पार्टी पंक्तिलाई सहयोग गर्न आव्हान गरेको छ ।
जिल्ला कमिटीसहित त्यसमाथिका कमिटीका सदस्यहरुबाट रु.तीन सय, नगर कमिटी तथा क्षेत्रीय कमिटीका सदस्यबाट दुई सय र गाउँ कमिटीका सदस्यहरुबाट एक सय रुपैयाँ संकलन गर्ने तथा अन्य शुभेच्छुक, शुभचिन्तक, व्यापारीक प्रतिष्ठान, अन्य संघसस्थाहरुलाई स्वेच्छिक रुपमा सहयोग गर्न अपिल गर्ने निर्णय भएको अध्यक्ष थपलियाले जानकारी दिनुभयो ।
Discussion about this post