एचआईभी सक्रमितलाई भेदभाव गरिएको गुनासो

भरतपुर । एचआईभी संक्रमितलाई समाजले हेर्ने दृष्टिकोणमा अझै पनि परिवर्तन हुन नसकेको संक्रमकितहरुले गुनासो पोखेका छन् । एचआईभी संक्रमितको अवस्था र उपचार सेवासम्बन्धी सिनर्जी एफएमले गरेको जनबहस कार्यक्रममा बोल्दै संक्रमितहरुले विभिन्न समस्या र अपठ्याराका कारण खुलेर आउन नसकेको बताएका छन् ।
छहारी महिला समूहकी उपाध्यक्ष मनु तामाङले समाजमा अझै पनि एचआईभी संक्रमितलाई हेर्ने नजरमा सुधार नभएको उल्लेख गरेकी छन् । समाजमा अझै पनि हेय र भेदभाव कायमै छ, घर परिवारले लगाउने अनावश्यक लाञ्छनाका कारण संक्रमितहरु थप पीडामा रहेको उनले बताइन् । एचआईभी संक्रमित खुल्न चाहे पनि डरका कारण खुल्न नसकेको उनको भनाइ थियो ।
राज्यले एचआईभी संक्रमितको विषयमा गम्भीर नबने समस्या झन् भयानक हुने उनले बताइन् । जिल्ला एड्स समन्वय समितिका पूर्वसंयोजक एवम् जिविस चितवनका कार्यक्रम अधिकृत रामहरि न्यौपानेले संक्रमितहरुलाई सामाजिकीकरण प्रक्रियामा घुलमिल गराउन ध्यान दिनुपर्ने बताए । भरतपुर अस्पतालमा वितरण हुने एआरटी औषधि वितरणमा समेत संक्रमितको गुनासो बढेको भन्दै उनले यसबारे सम्बन्धित निकाय गम्भीर हुनुपर्नेमा जोड दिए ।
संक्रमितको उपचारका लागि गत वर्ष जिल्ला जनस्वास्थ्यमा साढे तीन लाख बजेट फ्रिज भएको भन्दै न्यौपानेले एआरटी सेन्टरलाई जिम्मेवार भएर काम गर्न आग्रहसमेत गरेका छन् । एचआईभीको क्षेत्रमा आएको बजेटबारे सार्वजनिक बहस हुनु आवश्यक भएको भन्दै संक्रमितको अवस्थाबारे निरन्तर अनुगमन गर्नुपर्नेमा जोड दिए ।
यस्तै, संक्रमितको क्षेत्रमा काम गर्नेहरुले नेतृत्व हस्तान्तरणमा ध्यान दिनुपर्ने भन्दै व्यक्तिको विकास गर्नुपर्ने बताएका छन् । कार्यक्रममा बोल्ने सहभागीले रगत र औषधि समयमा पाउन नसक्दा समस्या बढेको बताएका थिए । एआरटी सेन्टरमा भए पनि पारदर्शी नहुँदा आफूहरु पीडित बनेको उनीहरुले बताए ।
सहभागीको गुनासोलाई जवाफ दिँदै एआटी सेन्टर भरतपुर अस्पतालका कार्यक्रम संयोजक कृष्णहरि सापकोटाले बजेटको अभावमा १ लाख रुपैयाँ रक्त सञ्चारलाई  तिर्न नसक्दा रगतको अभाव भएको बताए । खुलेर आउनुमात्र ठूलो कुरा नभएको भन्दै उनले संक्रमितले पनि यस्ता कुरा बुझ्नुपर्ने बताए । संक्रमितहरु खुले पनि एआरटी औषधि प्रयोग गर्न नमान्नेहरु धेरै भएको उनले बताए ।
जिल्ला जनस्वास्थ्य कार्यालयका जनस्वास्थ्य निरीक्षक दुर्गादत्त चापागाईले एचआईभीको लागि जनस्वास्थ्यमा सीमित बजेट आउने भए पनि आफूहरुले बिषयगत रुपमा आएको बजेट जनचेतनामूलक कार्यक्रम र संक्रमितको उपचारमा खर्च गरेको बताए । जिल्ला एड्स समन्वय समितिका संयोजक डिल्लीराम आचार्यले अबका दिनमा सबैसँग समन्वय गरेर काम गर्न तयार रहेको उनले बताए । चितवनमा एचआईभीको क्षेत्रमा काम गर्ने संस्था दसभन्दा बढी छन् । –विष्णुदेवी देवकोटा (प्रशिक्षार्थी)