युवा सूचना केन्द्र उत्कृष्ट

माडी । चितवनको माडीमा रहेको युवा सूचना केन्द्र उत्कृष्ट बनेको छ । संरक्षण, प्रजनन तथा यौन शिक्षामा अब्बल भएपछि केन्द्र नमुना बन्दै गएको हो । सोही केन्द्रमा रहेर यौन तथा प्रजनन शिक्षामा लामो समयदेखि क्रियाशील तीनजना युवा ‘उत्कृष्ट युवा अवार्ड’बाट सम्मानितसमेत भएका छन् ।
नेपाल परिवार नियोजन सङ्घ भरतपुरले बुधबार अन्तर्राष्ट्रिय युवा दिवसको सन्दर्भ पारेर स्वास्थ्य र संरक्षणको क्षेत्रमा उल्लेख्य काम गरेको भन्दै तीनजना युवालाई उत्कृष्ट युवा अवार्ड प्रदान गरेको जनाएको छ । युवा सूचना केन्द्र माडीका अध्यक्ष रेनुका भुसाल, सचिव बबिता पौडेल र सदस्य विष्णुबहादुर क्षेत्रीलाई युथ अवार्ड २०१४ प्रदान गरिएको हो  ।
विगत तीनवर्षदेखि यहाँका युवा मिलेर यौन तथा प्रजनन स्वास्थ्य एवम् वन र वातावरण संरक्षणमा जनचेतना जगाउँदै आएको थियो । गाउँमा अहिलेसम्म एक हजारभन्दा बढी मानिसलाई गाउँमा प्रजनन शिक्षाका बारेमा जानकारी दिइएको सूचना केन्द्रकी अध्यक्ष रेनुका भुसालले बताए ।
बघौडा मध्यवर्ती उपभोक्ता समितिका अध्यक्ष प्रभुप्रसाद महतोले उनीहरूले गाउँमा स्वास्थ्य चेतनाका लागि मह¤वपूर्ण योगदान गरेको उल्लेख गरे । युवा सूचना केन्द्र माडीका अध्यक्ष रेनुका भुसालले यस्तो सम्मानबाट युवा, स्वास्थ्य तथा संरक्षणको क्षेत्रमा काम गर्न प्रेरणा मिल्ने बताए ।
नेपाल परिवार नियोजन सङ्घका प्रबन्धक रोशन घिमिरेले विगतका वर्षमा पनि यौन तथा प्रजननको विषयमा युवा तथा किशोर–किशोरीलाई ज्ञान दिइएकाले यसप्रति सबै सचेत भएको जानकारी गराए । उक्त सूचना केन्द्रले स्कुलमै पुगेर किशोर–किशोरीलाई यौन तथा प्रजनन शिक्षाका बारेमा जनचेतना दिँदै आएको छ ।
महिनावारी हुँदाका समस्या, सरसफाइ, प्याड निर्माण, चाँडो विवाह गर्दा हुने खतरा तथा गर्भपतनका बारेमा चेतना दिन उनीहरू माडीका गाउँमा क्रियाशील छन् । यो अभियानमा ५० भन्दा बढी सहभागी भएका छन् । अभियानबाट गाउँमा सकारात्मक परिवर्तनसमेत भएको छ ।
पहिलेपहिले जानकारी दिन खोज्दा लजाउने युवा अहिले आफैँ प्रजननका बारेमा खुलेर बोल्न थालेको र अन्यलाई चेतना दिनसमेत थालेको भुसालले बताए । रासस