भरतपुर । जनताको तटबन्ध कार्यक्रममार्फत चितवन र नवलपरासीको सीमा भएर बग्ने नारायणी नदीमा १२ किलोमिटर क्षेत्रमा तटबन्ध गरिएको छ । तटबन्ध गरिएपछि यस क्षेत्रका स्थानीयले आफूहरू सुरक्षित भएको महसुस गरेका छन् ।
विसं २०६६ देखि अहिलेसम्म ६० करोडभन्दा बढी रकम खर्चेर १२ किलोमिटर तटबन्ध गरिएको हो । तटबन्ध भएपछि बस्ती जोगिएको जनताको तटबन्ध कार्यक्रमले दाबी गरेको छ । आर्थिक वर्ष २०७०÷७१ मा मात्रै रु नौ करोड पाँच लाख बजेटमा १९ मिटर तटबन्ध भएको कार्यक्रमका प्रमुख इन्जिनियर तिलकबहादुर खत्रीले बताए । यो वर्ष चितवनका चार गाविसमा कार्यक्रम सुरु भएको उनको भनाइ छ ।
नारायणी नदीले चितवनको मङ्गलपुर, गुञ्जनगर, मेघौली, भरतपुर नगरपालिकाका केही वडा तथा नवलपरासीको १४ वटा गाविसलाई प्रत्यक्ष प्रभावित पार्ने गर्छ । अहिले तटबन्ध भएपछि सो क्षेत्रमा ठूलो असर भने नदेखिएको खत्रीले दावी गरे ।
नारायणी नदीका बारेमा २०६६ सालमा यहाँ अध्ययन भएको थियो । यहाँको तटबन्धका लागि उक्त अध्ययनले साढे १० अर्ब लगानी गर्नुपर्ने देखाएको थियो । उक्त रकमबाट चितवन नवलपरासीतर्फ गरेर १०३ किलोमिटर तटबन्ध गर्नुपर्ने अध्ययनको निष्कर्ष छ । रासस
Discussion about this post