चितवन घुम्ने विदेशी पर्यटक उल्लेख्य बढी

कसरा । चितवन राष्ट्रिय निकुञ्ज घुम्न विदेशी नै बढी लालायित हुने गरेका छन् । विगत तीन वर्षको संख्या हेर्दा यही पुष्टि हुन्छ । योबीचमा निकुञ्ज घुम्ने विदेशी पर्यटकको संख्या उल्लेख्य मात्रामा बढेको छ भने सार्क क्षेत्र र स्वदेशी पर्यटकको संख्यामा सामान्यमात्रै सुधार देखिन्छ ।
निकुञ्ज कार्यालयको विवरणअनुसार आर्थिक वर्ष ०६९÷७० को तुलनामा गएको आर्थिक वर्ष ०७०÷७१ मा पर्यटकको संख्या बढेको छ । तर आर्थिक वर्ष ०६८÷६९ सँग तुलना गर्दा त्यो सुधार सामान्यजस्तो हो । तीन आर्थिक वर्षमध्ये वर्ष ०६९÷७० मा पर्यटक संख्या सबैभन्दा कम रहेको छ ।
आर्थिक वर्ष ०६८÷६९ मा चितवन राष्ट्रिय निकुञ्ज घुम्न कुल एक लाख ७० हजार ११२ पर्यटक आएका थिए । आर्थिक वर्ष ०६९÷७० मा भने यो संख्या घटेर एक लाख ५३ हजार ७४९ भयो । आर्थिक वर्ष ०७०÷७१ मा भने पर्यटक संख्या एक लाख ७३ हजार ४२५ पुगेको छ ।
चितवन निकुञ्ज घुम्न आउने विदेशी पर्यटकहरुको संख्या बढेको छ । चितवन निकुञ्ज घुम्ने नेपालीहरुको संख्या तीन वर्षअघिको जति यो आर्थिक वर्षमा पनि पुगेन । निकुञ्ज घुम्ने स्वदेशी पर्यटकको संख्या दुई वर्षअघिको तुलनामा जम्मा दुई हजारको हाराहारीमा मात्रै बढेको छ ।
आर्थिक वर्ष ०६८÷६९ मा निकुञ्ज घुम्ने नेपालीको संख्या ३९ हजार ७४८ थियो । आर्थिक वर्ष ६९÷७० मा नेपालीको संख्या ३१ हजार २८२ मा सीमित भयो । चितवन राष्ट्रिय निकुञ्जले दिएको जानकारीअनुसार गएको आर्थिक वर्ष ०७०÷७१ मा यो संख्या ३३ हजार २२६ पुग्यो ।
त्यसैले अघिल्लो वर्षको तुलनामा दुई हजारको हाराहारीमा मात्रै स्वदेशी पर्यटकहरु बढेको देखिन्छ । तर त्योभन्दा पनि अघिल्लो वर्षको संख्यासँग तुलना गर्ने हो भने झण्डै छ हजार पर्यटक अझै कम आएका छन् । सार्कको संख्या पनि कम नै छ । विदेशबाट आउने पर्यटकको संख्या यस्तो छैन ।
आर्थिक वर्ष ०६८÷६९ को तुलनामा आर्थिक वर्ष ०६९÷७० मा पनि विदेशीबाट निकुञ्ज घुम्न आउने पर्यटकको संख्या घटेको थियो । तर गएको आर्थिक वर्ष ०७०÷७१ मा विदेशी पर्यटकको संख्याले ०६८÷६९ को संख्यालाई उछिनेको छ ।
०६८÷६९ को तुलनामा विदेशी पर्यटकहरु आर्थिक वर्ष ०७०÷७१ मा १० हजार बढी आएका छन् । आर्थिक वर्ष ०६९÷७० सँग तुलना गर्दा सो संख्या १४ हजार बढी हो । स्वदेशीजस्तै सार्क क्षेत्रका पर्यटकहरुको संख्या तीन वर्षअघिको तुलनामा कम देखिएको छ ।
तीन वर्षअघिको तुलनामा नेपाली कम आएको मात्रै होइन, अघिल्लो आर्थिक वर्षको तुलनामा आर्थिक वर्ष ०७०÷७१ मा बढेको नेपाली पर्यटकहरुको संख्या पनि खासै सन्तोषजनक छैन । विदेशी १४ हजार र सार्कका तीन हजार बढ्दा नेपाली जम्मा दुई हजारमात्रै बढेका छन् ।
निकुञ्ज घुम्नेमा सबैभन्दा धेरै विदेशी, त्यसपछि स्वदेशी पर्यटकहरु हुने गरेका छन् । स्वदेशीपछि सार्कबाट घुम्न आउने पर्यटकको संख्या रहेको छ । पर्यटकको प्रवेश शुल्कबाट निकुञ्जले मनग्य आम्दानी गर्छ । आर्थिक वर्ष ७०÷७१ मा निकुञ्जले २४ करोड ६८ लाख ७१ हजार रुपैयाँ आम्दानी गरेको छ ।
विवरण    आर्थिक वर्ष  ०६८÷६९    आर्थिक वर्ष  ०६९÷७०    आर्थिक वर्ष  ०७०÷७१
विदेशी    १,१२,८५६    १,०८,७१४    १,२३,२८२
सार्क    १७,५०८    १३,७५३    १६,९१७
स्वदेशी    ३९,७४८    ३१,२८२    ३३,२२६
जम्मा       १,७०,११२    १,५३, ७४९    १,७३,४२५