विपन्न परिवारलाई सहयोग

रत्ननगर ।  रक्त क्यान्सरबाट ज्यान गुमाएका एक व्यक्तिका परिवारलाई यहाँका भवन निर्माण व्यवसायीले रु एक लाख एक हजार सहयोग गरेका छन् ।
विपन्न परिवार भएकाले उनीहरूलाई सहयोग गरेको भवन निर्माण व्यवसायी सङ्घ पूर्वी चितवनका अध्यक्ष केदार अधिकारीले जानकारी दिनुभयो । रत्ननगर नगरपालिका–६ लालपर्साका गोरे महतोको रक्त क्यान्सरका कारण मृत्युभएको थियो । विपन्न परिवारमा घरमुली नै नभएपछि उनका परिवारले ज्याला मजदुरीबाट गुजारा चलाउन थालेका छन् । परिवारकै बिचल्ली देखेर सदस्यहरूबाट पाँच–पाँच सय रुपैयाँ उठाएर रु एक लाख एक हजार सहयोग गरेको बताउनुभयो । उनको परिवारमा अहिले श्रीमती विस्मिता महतो र एक छोरा तथा दुई छोरी छन् । रासस