करारमा उपप्रध्यापक थप्न लागेकोमा विरोध

रामपुर क्याम्पसमा विवाद 
रामपुर । कृषि तथा वन विश्वविद्यालयले करारमा नयाँ उपप्राध्यापकहरु नियुक्ति गर्न सूचना निकालेपछि विश्वविद्यालयमा कार्यरत प्राध्यापक तथा कर्मचारीहरु आन्दोलनमा उत्रेका छन् । कृषि संकायमा ११ जना उपप्राध्यापकहरु पदपूर्ति गर्न डिन कार्यालयले साउन ९ गते सात दिने सूचना निकालेको थियो । प्राध्यापक तथा कर्मचारीहरुले सो सूचना खारेज गर्न माग गर्दै आइतबारबाट धर्ना दिएका छन् ।
‘तत्काल आवश्यकता नहुँदानहुँदै पनि विश्वविद्यालयको नियम र प्रावधानहरुलाई समेत मिचेर डिन कार्यालयले सूचना निकालेर प्राध्यापकहरु राख्न लागेको छ । त्यो खारेज हुनु पर्छ’, विश्वविद्यालयको कृषि संकाय डिन कार्यालयअगाडि धर्नामा बसेका उपप्राध्यापक सन्तोष मरहठ्ठाले भन्नुभयो । विश्वविद्यालयको कार्यकारिणी परिषद्ले असार ९ मा उपप्राध्यापक भर्ना गर्ने निर्णय गरेको थियो ।
सो निर्णय सार्वजनिक भएपछि विश्वविद्यालयका प्राध्यापकहरुले डिनको कार्यालयमा असार १५ मा तालाबन्दी गरेका थिए । तालाबन्दी कायमै रहेका बेलामा साउन ९ गते डिन कार्यालयले गोरखापत्रमा पदपूर्तिको विज्ञापन निकालेको छ । विश्वविद्यालयमा कार्यरत प्राध्यापक कर्मचारीहरुको आवाजमा सुनुवाइ नभएका कारण धर्ना सुरू गरेको प्राध्यापकहरुले बताए ।
डिन कार्यालयले बाली रोग विज्ञान, कीट विज्ञान, वातावरण विज्ञान, बाली विज्ञान, ग्रामीण समाजशास्त्र, कृषि अर्थशास्त्र र जैविक रसायन विज्ञानमा एक÷एकजना उपप्राध्यापक मागेको छ । त्यस्तै बाली प्रजनन् र बागवानी विज्ञानमा दुई÷दुईजना उपप्राध्यापक पदपूर्ति गर्ने डिन कार्यालयले निकालेको सूचनामा उल्लेख छ ।
सम्बन्धित विभागमा उपप्राध्याक आवश्यक भएनभएको बारेमा विभाग प्रमुखहरुसँग पनि राय नलिएको प्राध्यापकहरुले बताए । ‘मेरो विभागमा प्राध्यापक उपप्राध्यापकहरु आवश्यक छ या छैन भनेर मसँग सोध्नु पर्ने हो वा मैले माग गरेको हुनुपर्ने हो । मलाई केही थाहा नै छैन डिन कार्यालयले उपप्रध्यापक मागेछ’, कृषि अर्थशास्त्र विभागका प्रमुख जयप्रकाश दत्तले भन्नुभयो ।
प्राध्यापक वा कर्मचारीहरुको नियुक्ति विश्वविद्यालय सेवा आयोगमार्फत हुनुपर्नेमा डिन कार्यालयले गर्न लागेको मरहठ्ठाको भनाइ छ । विश्वविद्यालयको कर्मचारी नियमावलीमा शिक्षक कर्मचारी नियुक्ति गर्दा ३५ दिनको सूचना जारी गर्नुपर्नेमा जम्मा सात दिनको मात्रै मिति राखेर डिन कार्यालयले सूचना निकाल्नु नियमविपरीत भएको उहाँले बताउनुभयो ।
नियुक्ति गर्ने पदको न्यूनतम योग्यता प्राज्ञिक परिषद्ले निर्धारण गर्नुपर्नेमा डिन कार्यालय आफैँले गरेको आन्दोलनरत प्राध्यापकहरुले बताए । ‘विज्ञापनको म्याद छोटो राख्ने, समावेशी नगराउने, आवश्यक न्यूनतम योग्यता आफँै निर्धारण गर्ने नियतले विश्व कार्यकारिणी परिषद्का पदाधिकारीहरुले आफूले चाहेकाहरु मात्रै राख्न खोजियो’, संघर्षरत प्राध्यापकहरुले निकालेको विज्ञप्तिमा उल्लेख छ ।
परिषद्मा विश्वविद्यालयका उपकुलपति, रजिष्ट्रार, तीनजना डिनहरु र दुईजना प्राध्यापकहरु रहने नियम छ । ‘सबै कुरा नियमअनुरुप नै छ । ३५ दिनको अवधि स्थायी नियुक्ति दिन हो । करारमा राख्न सार्वजनिक सूचना निकालेर प्रतिस्पर्धा गराउने भन्ने छ । हामीले त्यही गरेका हौं’, परिषद् सदस्य विश्वविद्यालयका रजिष्ट्रार सूर्यकान्त घिमिरेले भन्नुभयो ।